InfoHub Logo

2026 جىلدىڭ جازىنان باستاپ قازاقستاندىقتار Temu جانە Pinduoduo سياقتى تانىمال قىتايلىق ونلاين-دۇكەندەردەن تاۋاردى بۇرىنعىداي ارزان باعامەن الا المايدى. سەبەبى، جەكە پايدالانۋعا ارنالعان بارلىق تاپسىرىستارعا ققس قوسىلادى. الايدا، بۇل وزگەرىستەر بيزنەس ءۇشىن قىتايدان جۇك تاسىمالداۋدى جەڭىلدەتۋگە باعىتتالعان.

بۇل تۋرالى Infohub.kz اقپارات اگەنتتىگى حابارلايدى.

ارزان كارگونىڭ اقىرى

قاراپايىم تۇتىنۋشىلار ءۇشىن ەڭ ۇلكەن وزگەرىس – جەكە پايدالانۋعا ارنالعان تاۋارلارعا سالىناتىن جاڭا سالىق. ەندى مەملەكەت بارلىق وسىنداي جونەلتىلىمدەردەن ققس جيناۋدى جوسپارلاپ وتىر. بۇل سالىقتى تاۋاردى جەتكىزۋشى كومپانيالار وزدەرى ۇستاپ قالادى.

ساراپشى دميتريي كازانسيەۆتىڭ ايتۋىنشا، بۇل مەملەكەتتىڭ تىكەلەي باسەكەگە ارالاسپاي، تەك سالىقتىق جۇيەنى كۇشەيتۋ ارقىلى ەكونوميكاعا ىقپال ەتۋ ارەكەتى. ول بىلاي دەيدى: «جەكە تۇلعالار ءوز تاۋارلارىن اكەلگەندە، جازعى ۋاقىتتان باستاپ قوسىمشا سالىق تولەيتىن بولادى. بۇل سالىقتى جەتكىزۋشىلەر ۇستاپ قالادى. سوندىقتان مەملەكەت باسەكەگە تىكەلەي ارالاسپاي، تەك وسى باسەكەلەس ورتاعا قوسىمشا سالىق سالۋ ارقىلى ارەكەت ەتەدى».

كوپتەگەن ساتىپ الۋشىلار جەرگىلىكتى كاسىپكەرلەردىڭ قىسىمىمەن تانىمال قىتايلىق قوسىمشالاردىڭ بۇعاتتالۋى مۇمكىن دەپ الاڭداعان بولاتىن. ءبىراق قارجى مينيسترلىگى باسقا جولدى تاڭدادى – فيسكالدىق. سەرۆيستەر قولجەتىمدى بولىپ قالا بەرەدى، ءبىراق بۇرىنعىداي ۇنەمدەۋ مۇمكىن بولمايدى.

«Temu مەن Pinduoduo-نى ەشكىم جاپپايدى، كەرىسىنشە، جەكە تۇلعالار ءۇشىن دە ققس ەنگىزىلگەندىكتەن، ءبارى قىمباتتايدى. بۇل وزگەرىستەر وسى جىلدىڭ جازىنان باستاپ كۇشىنە ەنەدى»، – دەپ حابارلادى كازانسيەۆ.

بيزنەس ءۇشىن قىتايدان تاسىمالداۋ جەڭىلدەيدى

ال بولشەك ساۋداداعى تۇتىنۋشىلار تاۋاردىڭ قىمباتتاۋىنا دايىندالىپ جاتقاندا، ەكى ەل اراسىنداعى جۇك تاسىمالداۋشىلار ءۇشىن جاعداي جاقسارا تۇسۋدە. بەيجىڭدە قىتاي-قازاقستان حالىقارالىق اۆتوموبيل تاسىمالداۋ جونىندەگى بىرلەسكەن كوميتەتىنىڭ وتىرىسى ءوتتى. ونىڭ قورىتىندىسى بويىنشا، 2026 جىلدىڭ سوڭىنا دەيىن رۇقساتتاردى الماسۋدىڭ شەكسىز فورماتىنا كوشۋ تۋرالى كەلىسىم جاسالدى. بۇعان دەيىن تاسىمالداۋشىلار ءۇشىن رۇقساتتاردىڭ سانى بەلگىلى ءبىر كۆوتامەن شەكتەلگەن بولاتىن، بۇل جۇك اعىنىنىڭ ءوسۋى كەزىندە كەدەرگىلەر تۋدىراتىن.

قازاقستان دەلەگاسياسىن ق ر كولىك مينيسترلىگى اۆتوموبيل كولىگى جانە كولىكتىك باقىلاۋ كوميتەتىنىڭ ءتوراعاسى باستاپ باردى. ونىڭ قۇرامىنا قارجى مينيسترلىگى مەملەكەتتىك كىرىستەر كوميتەتى مەن «قازاۆتوجول» ۇك» اق وكىلدەرى دە كىردى.

كۇن تارتىبىندەگى جەكە ماسەلە رەتىندە «نۇر جولى» وتكىزۋ پۋنكتىنىڭ وتكىزۋ قابىلەتىن ارتتىرۋ قارالدى. بۇل قازاقستان مەن جۇڭگو اراسىنداعى جۇك تاسىمالىنداعى نەگىزگى باعىتتاردىڭ ءبىرى بولىپ تابىلادى جانە ونىڭ جۇكتەمەسى تاسىمالداۋشىلار ءۇشىن ۇنەمى جۇيەلى ماسەلە بولىپ كەلگەن. 2026 جىلدىڭ ءبىرىنشى جارتىجىلدىعىنىڭ سوڭىنا دەيىن WeChat Pay ارقىلى قازاقستاندىق اقىلى اۆتوجولداردا تولەم جۇرگىزۋدى ەنگىزۋ دە جوسپارلانۋدا. بۇل قىتايلىق جۇرگىزۋشىلەردىڭ جۇمىسىن جەڭىلدەتەدى.

جۇڭگو قازاقستاننىڭ ەڭ ءىرى ساۋدا سەرىكتەسى بولىپ قالا بەرەدى. 2024 جىلدىڭ قورىتىندىسى بويىنشا ەكى ەل اراسىنداعى تاۋار اينالىمى 31 ملرد دوللاردان استى، جۇكتەردىڭ ەلەۋلى بولىگى اۆتوموبيل كولىگىمەن تاسىمالدانادى. كۆوتالىق شەكتەۋلەردىڭ الىنىپ تاستالۋى بيۋروكراتيالىق كەشىگۋلەرسىز كوبىرەك رەيستەردىڭ جاسالۋىنا مۇمكىندىك بەرەدى، بۇل تاۋارلاردىڭ جەتكىزۋ مەرزىمى مەن سوڭعى قۇنىنا اسەر ەتەدى.