InfoHub Logo

اقمولا وبلىسىنداعى دەرجاۆينسك قالاسىندا مەملەكەتتىك باعدارلاما بويىنشا باسپانالى بولعان وتباسىلار جاڭا ۇيلەرىنەن شىعارۋدى سۇراپ، دابىل قاعۋدا. جاڭا سالىنعان ۇيلەردىڭ جاعدايى ءماز ەمەس، پاتەرلەردە ساڭىراۋقۇلاق پەن دىمقىلدىق جايلاپ، ءتىپتى ءومىر سۇرۋگە جارامسىز بولىپ قالعان.

بۇل تۋرالى Infohub.kz اقپارات اگەنتتىگى حابارلايدى.

«بۇل جەردە ءومىر ءسۇرۋ مۇمكىن ەمەس: ۇنەمى دىمقىل، ساڭىراۋقۇلاق. باسقا پاتەرلەردە دە سولاي، ءتىپتى بەسىنشى قاباتتاردا دا سۋ اعىپ، ساڭىراۋقۇلاق پەن قاتتى دىمقىلدىق بار. جاقىندا تەكسەرىپ كەتتى، بۇگىن دە كەلدى، ءبىراق پاتەرلەرگە كىرمەدى، تەك سويلەستى. ءبىز بۇل پاتەرلەردى اۋىستىرعىمىز كەلەدى، سەبەبى بۇل دەنساۋلىققا ءقاۋىپتى، مۇندا ءومىر ءسۇرۋ مۇمكىن ەمەس»، - دەيدى يرينا لىسەنكو ەسىمدى تۇرعىن.

جاڭا ۇيلەردىڭ جاعدايى

دەرجاۆينسك قالاسىنىڭ ورتالىعىنداعى تولىق ەمەس جانە كوپبالالى وتباسىلار پاتەر كىلتتەرىن 2024 جىلدىڭ قىسىندا العان. ال كوكتەمگى العاشقى جاڭبىرمەن بىرگە پاتەرلەرگە سۋ كىرە باستاعان. اسىرەسە بەسىنشى قاباتتاعى پاتەرلەر زارداپ شەككەن. شاتىرداعى جاعدايدى كورگەن تۇرعىندار قاتتى تاڭعالعان: بارلىق جەردە جارىقتار مەن تەسىكتەر بولعان.

تۇرعىنداردىڭ ايتۋىنشا، بۇل ۇيگە بىرنەشە رەت كوميسسيا كەلگەن، ءتىپتى وبلىس اكىمى دە ماسەلەنى شەشۋدى تاپسىرعان. الايدا، قابىرعالار مەن بۇرىشتار ءالى كۇنگە دەيىن ساڭىراۋقۇلاقپەن جابىلعان. جاڭا باسپانانى ەشكىم ءالى ۋادە ەتپەگەن. قۇرىلىسشىلار بارلىق كەمشىلىكتەردى الداعى ءبىر ايدا جوندەپ شىعاتىنىنا سەندىرىپ وتىر.

«شاتىردىڭ بارلىق اۋماعىن تولىققاندى، ساپالى جوندەۋ ءۇشىن بىزگە قولايلى اۋا رايىنىڭ تۇراقتى بولۋىن كۇتۋ قاجەت بولدى. ءقازىر جۇمىستار قارقىندى ءجۇرىپ جاتىر. شاتىردى ءبىتىرىپ، تولىقتاي جابىق ەكەنىنە كوز جەتكىزگەن سوڭ، ءبىزدىڭ بريگادالار ءۇي ىشىندەگى زارداپتاردى جويۋعا كىرىسەدى»، - دەپ ۋادە بەردى «مەگا ستروي گرۋپپ» ج ش س وكىلى كەنەسارى قابكەنوۆ.