InfoHub Logo

توتەنشە جاعدايلار مينيسترلىگى الەۋمەتتىك جەلىدە قىزۋ تالقىلانعان Tesla Cybertruck كولىگىنە قاتىستى رەسمي تۇسىنىك بەردى. ۆەدومستۆونىڭ حابارلاۋىنشا، ەلەكتروموبيل الماتىنىڭ تاۋلى ايماقتارىندا قۇتقارۋ جۇمىستارىنا پايدالانىلادى.

بۇل تۋرالى Infohub.kz اقپارات اگەنتتىگى حابارلايدى.

بىلتىر جىل سوڭىندا تجم بەلگىسى بار Tesla Cybertruck كولىگىنىڭ ۆيدەوسى الەۋمەتتىك جەلىدە تاراپ، كوپشىلىكتىڭ تاڭدانىسىن تۋدىرعان ەدى. جەلى قولدانۋشىلارى بۇل كولىكتىڭ قانداي ماقساتتا قولدانىلاتىنىن بىلمەي، ءتۇرلى بولجام جاساعان.

قۇتقارۋ جۇمىستارىنا دايىندىق

مينيسترلىك Tengrinews.kz رەسمي ساۋالىنا بەرگەن جاۋابىندا ماتەريالدىق-تەحنيكالىق بازانى جۇيەلى تۇردە جاڭارتىپ، «زاماناۋي قۇتقارۋ تەحنيكاسىنىڭ ۇلگىلەرىن» زەرتتەپ جاتقانىن ءتۇسىندىردى.

ەلەكتروموبيل ەڭ الدىمەن شاقىرتۋلار ءجيى تۇسەتىن الماتىنىڭ تاۋلى ايماقتارى مەن وعان ىرگەلەس جاتقان اۋماقتاردا قولدانىلادى دەپ جوسپارلانعان. بۇل، اسىرەسە، ءار مينۋت ماڭىزدى سانالاتىن قيىن ساتتەردە بولىمشەلەردىڭ جاۋىنگەرلىك ازىرلىگى مەن ارەكەت ەتۋ جىلدامدىعىنا تىكەلەي اسەر ەتەدى.

ۆەدومستۆونىڭ مالىمەتىنشە، مۇنداي كولىك قۇتقارۋ بولىمشەلەرىن وقيعا ورنىنا جەدەل جەتكىزۋ، تابيعي جانە تەحنوگەندىك سيپاتتاعى توتەنشە جاعدايلارعا دەن قويۋ، اپاتتىق-قۇتقارۋ جۇمىستارىن جۇرگىزۋ جانە زارداپ شەككەندەردى، سونىڭ ىشىندە شۇعىل مەديسينالىق كومەككە مۇقتاج تۋريستەردى ەۆاكۋاسيالاۋ ءۇشىن پايدالانىلماق.