InfoHub Logo

ايتىس ونەرىنىڭ جاناشىرى، اقىن ءجۇرسىن ەرمان دەنساۋلىعىنا بايلانىستى باستان كەشكەن اۋىر كەزەڭىن العاش رەت اشىق ايتىپ، سول ساتتە مەملەكەت باسشىسى قاسىم-جومارت توقايەۆتىڭ قولداۋ كورسەتكەنىن جەتكىزدى. بۇل تۋرالى ول "1001 ءتۇن" باعدارلاماسىندا ايتتى.

بۇل تۋرالى Infohub.kz اقپارات اگەنتتىگى حابارلايدى.

اياعىمدى كەسۋگە ءماجبۇر بولعاندا...

اقىننىڭ ايتۋىنشا، قانت ديابەتى دەنساۋلىعىنا قاتتى اسەر ەتىپ، جاعدايى كۇرت ناشارلاعان. الماتىداعى بەدەلدى مەديسينالىق ورتالىقتا ەم قابىلداعانىمەن، دارىگەرلەر ونىڭ اياعىن كەسۋ قاجەتتىگىن ايتقان.

"مەنى قۇرتقان – قانت. ونىڭ قايدان كەلگەنىن كىم بىلەدى؟! قاتتى اۋىردىم. الماتىداعى بەدەلدى اۋرۋحانادا ەمدەلدىم. مەنى قاراپ جۇرگەن دارىگەر اياقتى كەسۋ كەرەكتىگىن ايتتى. "بۇلاي جاساماساق بولمايدى، ءولىپ قالاسىڭ" دەدى. ادامنىڭ اياعىن كەسۋ وڭاي ما؟! قويماي شەتەلگە بارىپ كەلەمىن دەپ شەشتىم. شۆەيسارياعا كەتىپ قالدىم. ول جاقتا قۇدام بار. دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى. ولار مەنى قاراپ، اياقتى كەسۋدىڭ قاجەتى جوق ەكەنىن ايتتى.

پرەزيدەنتتىڭ قولداۋى

شۆەيسارياعا بارۋ وڭاي بولعان جوق. پرەزيدەنتىم قاسىم-جومارت توقايەۆ بارىپ ەمدەلىپ كەل دەپ، كوپ اقشا بەردى. ونى بىلاي ءوزى ايتپايدى. ءبىراق مەن ىشىمنەن ءبىلىپ تۇرمىن، ريزا بولىپ تۇرمىن. سولاي اياعىمدى كەستىرمەي، قايتىپ كەلدىم. ءبىر كۇنى اۋرۋحانادان ەكى-ۇش كۇن قالدى دەپ شىعاراتىن بولدى. قىزدارىم قاراپ، شوپتەرمەن ەمدەپ، امان الىپ قالدى. حالىقتىڭ دا قولداۋى دەم بەرەدى"، - دەپ جان سىرىن اقتاردى اقىن.

ءجۇرسىن ەرمان كىم؟

ايتا كەتەيىك، ءجۇرسىن مولداش ۇلى ەرمانوۆ – 1951 جىلى قاراعاندى وبلىسىنىڭ ۇلىتاۋ وڭىرىندە دۇنيەگە كەلگەن اقىن، جۋرناليست جانە ايتىس ونەرىن جاڭعىرتۋشىلاردىڭ ءبىرى. ول قازاق ايتىسىن تەلەديدار مەن راديودا كەڭىنەن ناسيحاتتاپ، كوپتەگەن رەسپۋبليكالىق ايتىستاردىڭ ۇيىمداستىرۋشىسى بولدى. "جانارتاۋ"، "ارايلى كۇن، ارمىسىڭ!"، "ۇلىتاۋعا باردىڭ با؟.."، "قۇدىرەتكە جۇگىنۋ"، "ەكى تىزگىن، ءبىر شىلبىر" سىندى كىتاپتاردىڭ اۆتورى. قازاقستاننىڭ ەڭبەك سىڭىرگەن قايراتكەرى، "قۇرمەت" وردەنىنىڭ يەگەرى.