InfoHub Logo

تاريحتى زەردەلەۋ – وتكەنگە ورالۋ نەمەسە كونە زامانعا ساعىنىشپەن قاراۋ ەمەس. بۇل تۋرالى پرەزيدەنت قاسىم-جومارت توقايەۆ «التىن وردا – دالا وركەنيەتىنىڭ مودەلى: تاريح، ارحەولوگيا، مادەنيەت جانە بىرەگەيلىك» اتتى حالىقارالىق سيمپوزيۋمدا مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

تاريحي ميسسيانى جاڭعىرتۋ

«ءبىز الەمنىڭ ماڭىزدى گەوساياسي جانە وركەنيەتتىك ورتالىعى رەتىندە تاريحي ميسسيامىزدى جاڭعىرتا باستادىق. بۇل ۇدەرىستە جاس ۇرپاقتى قوسا العاندا، حالقىمىزدىڭ بىرەگەي رۋحى مەن كۇشى شەشۋشى ءرول اتقارادى. سونىڭ ارقاسىندا بۇگىن الدىمىزعا بيىك ماقساتتار قويىپ، ماڭىزدى مىندەتتەردى اتقارىپ جاتىرمىز. سوندىقتان اتا-بابامىزدىڭ باي مۇراسىن زاماناۋي قۇندىلىقتارمەن جانە وزىق تەحنولوگيالارمەن ۇشتاستىرۋ ماڭىزدى. تاريحتى زەردەلەۋ – وتكەنگە ورالۋ نەمەسە كونە زامانعا ساعىنىشپەن قاراۋ ەمەس. وتكەنگە تەلمىرۋ – ناداندىق پەن قاراڭعىلىققا اپارار جول. ءوز تامىرلارىمىزدى تەرەڭ ءبىلۋ ارقىلى ۇلتتىڭ دامۋ القاسىن كەڭەيتۋ قاجەت. وسىعان وراي، جاڭا كونستيتۋسيادا مادەني مۇرانى ساقتاۋعا، ءبىلىم، عىلىم جانە يننوۆاسيانى دامىتۋعا ەرەكشە نازار اۋداردىق. بۇل جۇمىستى ءبىز باستاپ كەتتىك»، – دەدى مەملەكەت باسشىسى.

جاڭا تەحنولوگيالار جانە جاس ۇرپاق

قاسىم-جومارت توقايەۆ ءبىر اپتا بۇرىن ورتا ءبىلىم بەرۋ جۇيەسىنە جاساندى ينتەللەكت ەنگىزۋ تۋرالى ارنايى جارلىققا قول قويعانىن ەسكە سالدى.

«بەلگىلى بولعانداي، زاماناۋي تەحنولوگيالار ءومىردىڭ بارلىق سالاسىنا تۇبەگەيلى ەنىپ، اۋقىمدى وزگەرىستەر اشىپ وتىر. بۇل ۇدەرىس ادامزاتتىڭ بولاشاعىنا تىكەلەي اسەر ەتەدى. باسقاشا ايتقاندا، وزىق تەحنولوگيالار جوعارى قارقىنمەن دامۋدا – بۇل 21ء-شى عاسىردىڭ شىندىعى. ءبىز مۇنى جاقسى تۇسىنەمىز، سوندىقتان ۋاقىت تالابىنا تەز بەيىمدەلەتىن ۇرپاق تاربيەلەۋگە ەرەكشە كوڭىل بولەمىز. بۇل باعىتتا ءبىرقاتار باستامالار جۇزەگە اسىرىلۋدا»، – دەپ اتاپ ءوتتى پرەزيدەنت.