InfoHub Logo

اقش پرەزيدەنتى دونالد ترامپ جۋرناليستەرگە يرانمەن جاسالعان ۋاقىتشا ءبىتىمنىڭ مەرزىمى اياقتالسا، «جاپپاي بومبالاۋ» بولاتىنىن ايتتى. بۇل شارانىڭ قاشان جانە قايدا بولاتىنىن ساياساتكەر ناقتىلامادى.

بۇل تۋرالى Infohub.kz اقپارات اگەنتتىگى حابارلايدى.

«ەگەر ءبىتىم ەرتەڭ كەشكە دەيىن كۇشىن جويسا نە بولادى؟» دەگەن ءجۋرناليستتىڭ سۇراعىنا ترامپ: «وندا جاپپاي بومبالاۋ باستالادى»، – دەپ قىسقا جاۋاپ بەردى.

اقش پرەزيدەنتى امەريكا قۇراما شتاتتارىنىڭ يسلامابادتا كەلىسسوزدەر جۇرگىزۋدى جوسپارلاپ وتىرعانىن ناقتىلادى. يران وكىلدەرىنىڭ قاتىساتىنى-تۇعىنى بەلگىسىز. الايدا، ترامپتىڭ ايتۋىنشا، نەگىزگى ماسەلە سول كۇيىندە قالادى – يراندا يادرولىق قارۋ بولماۋى كەرەك.

Truth Social جەلىسىندەگى مالىمدەمەسى

سونىمەن قاتار، ترامپ ءوزىنىڭ Truth Social الەۋمەتتىك جەلىسىندە يرانمەن اسكەري قاقتىعىس تۋرالى پىكىرىن ءبىلدىردى. ساياساتكەردىڭ ايتۋىنشا، سوعىستىڭ باستالۋىنا 2023 جىلدىڭ قازان ايىنداعى وقيعالار سەبەپ بولعان. ترامپ باسقا سەبەپتەردى العا تارتاتىنداردى «جالعان جاڭالىقتار» دەپ اتاپ، «تاڭعالاتىنىن» جازدى.

«يزرايل مەنى ەشقاشان يرانمەن سوعىسقا يتەرمەگەن جوق – مەنى بۇل جاعدايعا 7 قازان وقيعالارى اكەلدى، سونداي-اق مەنىڭ بۇرىننان كەلە جاتقان ۇستانىمىم: يراندا ەشقاشان يادرولىق قارۋ بولماۋى كەرەك»، – دەلىنگەن حابارلامادا.

اقش پرەزيدەنتىنىڭ پىكىرىنشە، ەگەر يراننىڭ جاڭا باسشىلارى ەلدەگى رەجيم اۋىسقان جاعدايدا «اقىلدى بولسا»، ولار ءۇشىن «ۇلى جانە گۇلدەنگەن بولاشاق» بولۋى مۇمكىن.

يراننىڭ جاۋابى

بۇعان دەيىن يران ومان شىعاناعىنداعى يسلام رەسپۋبليكاسى تۋىنىڭ استىندا ءجۇزىپ بارا جاتقان جۇك كەمەسىنە اقش-تىڭ شابۋىلىن ءبىتىمدى بۇزۋ دەپ اتاپ، تەگەرانداعى بيلىك وكىلدەرىنىڭ مالىمدەۋىنشە، اقش اسكەري كەمەلەرىنە دروندارمەن سوققى بەرگەن.

بۇعان دەيىن اقش پرەزيدەنتى دونالد ترامپ ءوزىنىڭ Truth Social جەلىسىندە امەريكا اسكەري-تەڭىز كۇشتەرى يراننىڭ پورتتارىنا ۆاشينگتون ورناتقان تەڭىز بلوكاداسىن اينالىپ وتۋگە تىرىسقان يران تۋىنىڭ استىنداعى جۇك كەمەسىن باسىپ العانىن حابارلاعان بولاتىن. ونىڭ ايتۋىنشا، يراندىق ەكيپاج باعىنۋدان باس تارتقان، سودان كەيىن امەريكاندىق زىمىران ەسمينەسى كەمەنى توقتاتىپ، ماشينا بولىمىنە تەسىك جاساعان. قازىرگى ۋاقىتتا كەمە اقش تەڭىز جاياۋ اسكەرىنىڭ باقىلاۋىندا.