InfoHub Logo

اقش پرەزيدەنتى دونالد ترامپ يران استاناسىنا جاسالعان تۇندەگى شابۋىلداردىڭ كادرلارىن جاريالادى. بۇل تۋرالى Infohub.kz اقپارات اگەنتتىگى حابارلايدى.

امەريكا كوشباسشىسى "The Truth Social" الەۋمەتتىك جەلىسىندە ۆيدەو جاريالادى.

"يراننىڭ ناشار جانە اقىلسىز باسشىلىق ەتكەن كوپتەگەن اسكەري ليدەرلەرى تەگەرانعا جاسالعان بۇل اۋقىمدى سوققىنىڭ ناتيجەسىندە جويىلدى!" - دەپ جازدى ول.

اقش پەن يزرايل 28 اقپاننان باستاپ يرانعا اۋە شابۋىلدارىن جاساپ كەلەدى. بۇل شابۋىلداردىڭ سالدارىنان يراننىڭ جوعارعى كوشباسشىسى اياتوللا الي حامەنەي جانە ءبىرقاتار جوعارى لاۋازىمدى شەنەۋنىكتەر مەن كۇش قۇرىلىمدارىنىڭ وكىلدەرى قازا تاپتى.

ءوز كەزەگىندە يران يزرايل مەن پارسى شىعاناعى ەلدەرىنە زىمىراندار مەن دروندار ارقىلى شابۋىل جاساۋدا. يسلام رەسپۋبليكاسىنىڭ مالىمدەۋىنشە، اراب ەلدەرىنە جاسالعان شابۋىلداردىڭ ماقساتى – ايماقتاعى امەريكاندىق اسكەري بازالارى بولىپ تابىلادى. سونداي-اق، پارسى شىعاناعىنداعى ءبىرقاتار ەلدەردەگى مۇناي قويمالارى مەن مۇناي تانكەرلەرى دە يراندىق سوققىلارعا ۇشىراعان.

پەنتاگون دەرەكتەرىنە سىلتەمە جاساعان باق-تىڭ حابارلاۋىنشا، "ەپيكالىق قاھار" وپەراسياسى باستالعاننان بەرى 365 امەريكاندىق اسكەري قىزمەتشى جاراقات العان. ونىڭ ىشىندە 247 قۇرلىق اسكەرىنىڭ قىزمەتكەرى، 63 تەڭىزشى، 19 تەڭىز جاياۋ اسكەرى جانە 36 ۇشقىش بار. قازا تاپقانداردىڭ سانى 13 ادامعا جەتتى: جەتەۋى ۇرىس قيمىلدارىنان، التاۋى كۋۆەيتتەگى يراندىق اۋە شابۋىلىنان قازا تاپتى، تاعى بىرەۋى ساۋد ارابياسىندا العان جاراقاتىنان قايتىس بولدى.

بۇل كورسەتكىشكە 3 ساۋىردە يراندىق كۇشتەرمەن اتىپ تۇسىرىلگەن نەمەسە سوققىعا ۇشىراعان امەريكاندىق اسكەري ۇشاقتاردىڭ ەكيپاجدارى كىرەتىنى ءالى بەلگىسىز.

سەنبى كۇنى ترامپ "The Truth Social" الەۋمەتتىك جەلىسىندە يرانعا كەلىسىم جاساسۋعا نەمەسە ورمۋز بۇعازىن اشۋعا 48 ساعات ۋاقىتى قالعانىن، ايتپەسە ەلگە "توزاق" جابىلاتىنىن مالىمدەدى. ول تەگەرانعا بۇل شارتتاردى ورىنداۋ ءۇشىن ون كۇن بەرگەنىن ەسكە سالدى. بۇعان دەيىن تەگەران امەريكا قۇراما شتاتتارى، يزرايل جانە ولاردىڭ وداقتاستارىنىڭ كەمەلەرى ءۇشىن ورمۋز بۇعازىن جىلدار بويى بلوكادادا ۇستاي الاتىنىن مالىمدەگەن بولاتىن.