InfoHub Logo

اقش پرەزيدەنتى دونالد ترامپ ۋكراينا پرەزيدەنتى ۆلاديمير زەلەنسكييدى رەسەيمەن كەلىسسوزدەردەگى «تاماشا مۇمكىندىكتى» جىبەرىپ الماۋ ءۇشىن تەز ارەكەت ەتۋگە شاقىردى. بۇل تۋرالى ول جۇما كۇنى، 13 اقپاندا جۋرناليستەرگە مالىمدەدى.

اق ءۇيدىڭ X الەۋمەتتىك جەلىسىندەگى رەسمي پاراقشاسىندا جاريالانعان بريفينگ ۇزىندىلەرىندە ترامپ: «زەلەنسكيي ارەكەت ەتۋگە ءتيىس. رەسەي كەلىسىم جاساعىسى كەلەدى، ال زەلەنسكيي ارەكەت ەتۋى كەرەك – ايتپەسە ول تاماشا مۇمكىندىكتى جىبەرىپ الادى. ول ارەكەت ەتۋى كەرەك»، - دەدى.

بۇعان دەيىن زەلەنسكيي The Atlantic جۋرنالىنا بەرگەن سۇحباتىندا «جامان بەيبىتشىلىككە» قاراعاندا سوعىستى جالعاستىرۋدى ءجون كورەتىنىن ايتقان بولاتىن. ۋكراينا پرەزيدەنتى ەگەر ءوز حالقىن جامان كەلىسىمگە كوندىرۋگە ءماجبۇر بولسا، كەلىسىمنەن مۇلدەم باس تارتاتىنىن اتاپ ءوتتى. ول تولىق اۋقىمدى سوعىستىڭ ءتورت جىلىنان كەيىن كۇرەستى جالعاستىرۋعا دايىن ەكەنىن ايتىپ سەندىردى. پرەزيدەنت مايدانداعى جاعدايعا قاتىستى پىكىر بىلدىرە وتىرىپ، ۋكراينا جەڭىلمەيتىنىن مالىمدەدى.

ۋكراينا باسشىسى سونداي-اق، ەگەر ترامپ ءوزىنىڭ بەيبىتشىلىك ورناتۋشى رەپۋتاسياسىن نىعايتىپ، كونگرەسس ارالىق سايلاۋداعى جەڭىس مۇمكىندىگىن ارتتىرعىسى كەلسە، وسى ءساتتى پايدالانىپ، ۋكرايناداعى سوعىستى توقتاتۋى كەرەكتىگىن ايتتى.

ايتا كەتەيىك، ۋكراينا، رەسەي جانە اقش دەلەگاسيالارىنىڭ كەزەكتى كەلىسسوزدەرى 17-18 اقپاندا جەنيەۆادا وتەدى دەپ جوسپارلانعان. Politico باسىلىمىنىڭ حابارلاۋىنشا، امەريكاندىق تاراپ بۇل كەزدەسۋدە ىلگەرىلەۋشىلىككە قول جەتكىزۋدى كۇتەدى. دەگەنمەن، باستى كەدەرگى اۋماقتىق ماسەلە بولىپ قالا بەرەدى.