InfoHub Logo

اقش پرەزيدەنتى دونالد ترامپتىڭ ۇلدارى، دونالد ترامپ-كىشى جانە ەريك ترامپ، قازاقستانداعى ۆولفرام ءوندىرۋ جوباسىنا قاتىسۋدا. بۇل تۋرالى Financial Times گازەتى ءوز دەرەككوزدەرىنە سىلتەمە جاساپ حابارلادى.

بۇل تۋرالى Infohub.kz اقپارات اگەنتتىگى حابارلايدى.

گازەتتىڭ مالىمەتىنشە، ترامپتىڭ ۇلدارىمەن بايلانىستى كومپانيا 2025 جىلى قازاقستاندا ۆولفرام ءوندىرۋ ءۇشىن اقش-تىڭ مەملەكەتتىك قولداۋى رەتىندە 1،6 ميلليارد دوللار العان ماڭىزدى مينەرالداردى ءوندىرۋ حولدينگىمەن بىرىگۋگە كەلىسكەن.

جوبانىڭ قۇرىلىمى

دەرەككوزدەردىڭ ايتۋىنشا، ترامپتىڭ ۇلدارى وتكەن جىلى Skyline Builders قۇرىلىس كومپانياسىنىڭ ۇلەسىن ساتىپ العان. بۇل تىكەلەي ەمەس، Dominari Securities LLC ينۆەستيسيالىق-كەڭەسشىلىك فيرماسىمەن بايلانىستى قۇرىلىم ارقىلى جۇزەگە اسقان.

سودان كەيىن Skyline كومپانياسى «ازياداعى ماڭىزدى مينەرالداردىڭ ايتارلىقتاي اكتيۆتەرىنە يە» كومپانيانىڭ 20% ۇلەسىن 20 ميلليون دوللارعا ساتىپ الۋدى شەشكەن. بۇل امەريكاندىق Cove Capital ينۆەستيسيالىق توبىنىڭ ەنشىلەس كومپانياسى بولىپ شىقتى.

Cove Capital جانە «قازاقستاننىڭ ۇلتتىق تاۋ-كەن كومپانياسى» اق «ءىرى بارلانعان، ءبىراق يگەرىلمەگەن ۆولفرام كەن ورنىن» يگەرۋ تۋرالى كەلىسىم جاساسقانى حابارلاندى. Cove Capital قۇرىلىمدارى Skyline-مەن بىرىگۋ تۋرالى كەلىسىمگە كەلدى. Financial Times مالىمەتىنشە، ءبىرقاتار مامىلەلەر ناتيجەسىندە Kaz Resources دەگەن اتپەن Nasdaq بيرجاسىندا تىزىمدەلۋگە دايىندالىپ جاتقان جاڭا كومپانيا پايدا بولدى.

رەسمي حابارلامادا نە ايتىلعان

Kaz Resources كومپانياسىنىڭ رەسمي سايتىندا 30 ساۋىردە جاريالانعان باسپا ءسوز حابارلاماسىندا Skyline Builders Group Holding Ltd جانە Cove Kaz Capital Group LLC بىرىگۋ تۋرالى كەلىسىمگە كەلگەنى راستالدى. بىرىككەن كومپانيا اقش-قا ۆولفرام، سيرەك جەر ەلەمەنتتەرى جانە باسقا دا ماڭىزدى مينەرالداردى جەتكىزەتىن بولادى.

باسپا ءسوز حابارلاماسىندا Skyline كومپانياسىنىڭ بۇل مامىلە ارقىلى اقش-قا ماڭىزدى مينەرالداردىڭ نەگىزگى جەتكىزۋشىسى بولۋ ستراتەگيالىق ماقساتىنا جەتەتىنى ايتىلعان. سونداي-اق، كومپانيا ۆولفراممەن قاتار ليتيي، بەريلليي، تانتال، نيوبيي جانە رۋبيديي سياقتى سيرەك جەر ەلەمەنتتەرىن دە جەتكىزۋگە دايىن ەكەنى ناقتىلانعان. بۇعان قوسا، بيزنەس بىرىكتىرۋ مامىلەسىنە قازاقستاندا 15 ليسەنزياسى بار تاعى ءبىر امەريكاندىق KAZ Critical Minerals كومپانياسى دا كىرەتىنى حابارلاندى.

قانداي كەن ورنى تۋرالى ءسوز بولىپ وتىر؟

باسپا ءسوز حابارلاماسىنا سايكەس، مامىلەنىڭ نەگىزىندە «تاۋ-كەن ساماۇرىق» ۇلتتىق تاۋ-كەن كومپانياسىنان قاراعاندى وبلىسىنداعى «سولتۇستىك قاتپار» جانە «ۇستىڭگى قايراق تى» كەن ورىندارىنا ليسەنزياسى بار «سولتۇستىك قاتپار» ءجشس-نىڭ 70% اكسياسىن ساتىپ الۋ جاتىر.

«تاۋ-كەن ساماۇرىق» سايتىندا سولتۇستىك قاتپار كەن ورنى ورتاشا قورلارعا يە بولسا، ۇستىڭگى قايراق تى كەن ورنى الەمدەگى ەڭ ءىرى ءۇش ۆولفرام كەن ورنىنىڭ ءبىرى (1 ميلليون توننادان استام) بولىپ سانالادى.

انىقتاما: ۆولفرام – سيرەك كەزدەسەتىن حيميالىق ەلەمەنت، ونىڭ بىرەگەي فيزيكالىق قاسيەتتەرىنە بايلانىستى ماشينا جاساۋ، تاۋ-كەن ونەركاسىبى، قورعانىس ونەركاسىبى، اۆياسيا، يادرولىق فيزيكا، يادرولىق مەديسينا، مۇناي حيمياسى سياقتى كوپتەگەن سالالاردا سۇرانىسقا يە.

«قازاقستان تاراپى باقىلاۋدى ساقتايدى»

اعىمداعى جىلدىڭ 21 ساۋىرىندە «تاۋ-كەن ساماۇرىق» سايتىندا كومپانيا مامىلە تۋرالى تۇسىنىكتەمە بەرگەن حابارلاما جاريالاندى. وندا ۆولفرام كەن ورىندارىن ساتۋ تۋرالى ءسوز جوق ەكەنى اتاپ ءوتىلدى. الايدا، Cove Capital بىرلەسكەن كاسىپورىننىڭ جارعىلىق قورىنىڭ 70% ۇلەسىن الاتىنى راستالدى.

«امەريكالىق ينۆەستورمەن جاسالعان كەلىسىم سولتۇستىك قاتپار جانە ۇستىڭگى قايراق تى كەن ورىندارىن يگەرۋ جوباسىنا ستراتەگيالىق كاپيتال مەن عىلىمدى قاجەت ەتەتىن تەحنولوگيالاردى تارتۋدى كوزدەيدى. كەلىسىم اياسىندا كومپانيا 1 ميلليارد دوللاردان استام قارجىنى، سونداي-اق ونىمەن بايلانىستى تەحنيكالىق جانە وپەراسيالىق تاۋەكەلدەردى ءوز موينىنا الادى»، - دەلىنگەن مالىمدەمەدە.

كومپانيا قازاقستاندىق تاراپتىڭ كەن ورنىنا جانە جوبانى ىسكە اسىرۋعا ستراتەگيالىق باقىلاۋدى ساقتايتىنىن اتاپ ءوتتى.

سونداي-اق، جوبا قازاقستان اۋماعىندا دايىن ءونىم شىعارۋعا باعىتتالعانى، بۇل ەل ىشىندە قوسىمشا قۇن قۇرۋدى، جاڭا جۇمىس ورىندارىن اشۋدى جانە سالىق تۇسىمدەرىن قامتاماسىز ەتۋى ءتيىس ەكەنى ايتىلعان.

«بۇعان قوسا، حالىقارالىق سەرىكتەستىڭ قاتىسۋى بۇگىنگى كۇنى وتاندىق ەكونوميكادا كەڭ سۇرانىسقا يە ەمەس ۆولفرام ونىمدەرى ءۇشىن تۇراقتى وتكىزۋ نارىعىن قامتاماسىز ەتەدى»، - دەلىنگەن حابارلامادا.

اقش-قا نە ءۇشىن قاجەت قازاقستاننىڭ سيرەك جەر ەلەمەنتتەرى؟

ساراپشىلار سيرەك جەر ەلەمەنتتەرىن زاماناۋي تەحنولوگيالىق ەكونوميكا ءۇشىن ماڭىزدىلىعىنا بايلانىستى «جاڭا مۇناي» دەپ اتايدى. ولاردىڭ ەلەكترونيكا جانە قورعانىس ونەركاسىبىندە قولدانىلاتىنىن ەسكەرە وتىرىپ، ولارعا ءبىرىنشى كەزەكتە ءىرى وندىرىستەرى بار ەلدەر مۇددەلى.

سيرەك جەر ەلەمەنتتەرىن ءوندىرۋ جانە قايتا وڭدەۋ بويىنشا الەمدىك كوشباسشى جۇڭگو بولىپ تابىلادى. Bloomberg ساراپشىلارى قىتايدىڭ ساۋدا سوعىسى كەزىندە اقش-قا قىسىم كورسەتۋ قۇرالى رەتىندە سيرەك جەر مەتاللدارىن قولداناتىنىن اتاپ وتەدى. مىسالى، وتكەن جىلى ترامپ ەنگىزگەن باج سالىعىنا جاۋاپ رەتىندە جۇڭگو ۇكىمەتى سيرەك جەر ەلەمەنتتەرىنە جاڭا ەكسپورتتىق شەكتەۋلەر ەنگىزدى. وسىلايشا، بۇل نارىقتاعى قىتايدىڭ ۇستەمدىگى ءتيىمدى ەكونوميكالىق تەتىككە اينالدى، سوندىقتان اقش سيرەك جەر ەلەمەنتتەرىن جەتكىزۋدىڭ بالاما جولدارىن ىزدەۋدە.

بيىل اقپان ايىندا ترامپ قىتايدان جەتكىزىلەتىن شيكىزاتقا تاۋەلدىلىكتى ازايتۋ ءۇشىن 12 ميلليارد دوللارلىق ماڭىزدى مينەرالداردىڭ ستراتەگيالىق قورىن قۇرۋ جوسپارىن مالىمدەگەنىنە توقتالعان ءجون. بۇل تۋرالى دا Bloomberg حابارلاعان.

سونداي-اق وقىڭىز: ترامپ سيرەك جەر مەتالدارى بويىنشا كەلىسىمگە قول قويىپ، جاپونيادا بيلەدى