InfoHub Logo

تۇركىستان قالاسىنداعى كوپقاباتتى ءۇيدىڭ تۇرعىندارى ۇيلەرىنىڭ جاعدايىنا قاتتى اشۋلى. بەس جىل بۇرىن مەملەكەتتىك باعدارلاما بويىنشا العان پاتەرلەرىندەگى اپاتتى جاعداي ولاردى ابدەن شارشاتىپتى. توبەسىنەن سۋ اعىپ، جەرتولەسى سۋعا تولىپ، قابىرعالارى زەڭدەپ كەتكەن ۇيلەردە ءومىر ءسۇرۋ «تىرىدەي ازاپ» ەكەنىن ايتادى.

بۇل تۋرالى Infohub.kz اقپارات اگەنتتىگى حابارلايدى.

«تىرىدەي ازاپ»: تۇرعىنداردىڭ شاعىمى

تۇركىستاننىڭ جاڭا اۋدانىندا سالىنعان بۇل تۇرعىن ءۇي كەشەنىندە پروبلەمالار ءۇي سالىنعاننان كەيىن بىردەن باستالعان. جاڭبىر جاۋسا، توبەسىنەن سۋ اعىپ، ءتىپتى وعان شىعۋدىڭ ءوزى ءقاۋىپتى ەكەنىن ايتادى تۇرعىندار. جەرتولەدەگى سۋ مەن پودەزدەگى توزىعى جەتكەن ەلەكتر سىمدارى دا الاڭداۋشىلىق تۋدىرۋدا. سىروست پەن سۋىقتان پاتەر قابىرعالارى زەڭدەپ، سىلاقتارى قابىرشاقتانىپ تۇسۋدە.

«بەس جىل دا بولعان جوق، ءالى كۇنگە دەيىن سۋ اعىپ تۇر. ءار جاڭبىردان قورقامىز، ويتكەنى ۇيدە وتىرۋ مۇمكىن ەمەس! ءبىز جۇمىستا بولعاندا بالالار ۇيگە قوڭىراۋ شالىپ: «ماما، سۋ تامشىلاپ تۇر! ماما، سۋ اعىپ جاتىر!» دەيدى. ءبارىن تاستاپ، سۋدى جيناۋعا جۇگىرۋگە ءماجبۇرمىز»، - دەيدى ءۇي يەلەرىنىڭ ءبىرى.

تۇرعىندار مەن مەردىگەر اراسىنداعى داۋ

جوعارىدان عانا ەمەس، تومەننەن دە سۋ اعىپ جاتىر. تۇرعىنداردىڭ ايتۋىنشا، قۇبىرلاردىڭ دۇرىس ورنالاستىرىلماۋىنان جەرتولە ۇنەمى سۋعا تولىپ، جاعىمسىز ءيىس شىعادى. سوڭعى بەس جىلدا التى رەت قۇبىرلاردى اۋىستىرۋعا تۋرا كەلگەن. ءار ەكى اي سايىن يىستەن ارىلۋ ءۇشىن دەزينفەكسيا جاساۋعا ءماجبۇر.

«ءبىز كومپانيامەن سوتتاستىق. ەكى جىل سوتتا جۇردىك! جەڭدىك. ولار ءبارىن جاسايمىز دەپ ۋادە بەردى، ءبىراق ەش ناتيجە بولمادى. نە ىستەسەك تە، قايدا جۇگىنسەك تە، ءبارىبىر! تەك ۋادەلەر، ارەكەت جوق!»، - دەيدى قالا تۇرعىندارىنىڭ ءبىرى.

تۇرعىندار قۇرىلىسشىلار مەن ءۇيدى قابىلداعان شەنەۋنىكتەردى بىرنەشە رەت شاقىرعانىمەن، مەردىگەر ءالى كەلمەگەن. بيلىك وكىلدەرى تەك ماسەلەنى شەشۋگە ۋادە بەرىپ ءجۇر.

قۇرىلىس باسقارماسىنىڭ جاۋابى

قالالىق قۇرىلىس ءبولىمىنىڭ باسشىسىنىڭ ورىنباسارى داۋرەن ماۋلەنوۆتىڭ ايتۋىنشا، كەپىلدىك مەرزىمى اياقتالعانىمەن، شاتىر مەن فاساد سياقتى كونسترۋكسيالىق ەلەمەنتتەردى اۋىستىرۋ قاجەت. زاڭ بويىنشا مەردىگەرگە حابارلانىپ، جۇمىستاردى ورىنداۋ مىندەتتەلگەن. ول سونداي-اق، ءۇيدىڭ ساپاسى 5-10 جىلدا وزگەرمەيتىنىن، امورتيزاسيا مەن دۇرىس پايدالانباۋ سالدارىنان توزۋ بولاتىنىن اتاپ ءوتتى.

ەگەر مەردىگەردىڭ كىناسى انىقتالسا، جۇمىستار ونىڭ ەسەبىنەن جۇرگىزىلەتىنىن ايتتى ول.

الايدا، بۇل ۋادەلەردى جەرگىلىكتى بيلىك تاراپىنان تۇرعىندار بۇعان دەيىن دە ەستىگەن. سوندىقتان ولار ساپاسىز قۇرىلىس ماسەلەسىن شەشۋگە قاۋقارى بار باسقا ورگانداردىڭ ارالاسۋىن سۇراۋدا.