InfoHub Logo

ەندى كولونيا-تۇزەتۋ مەكەمەلەرىندە جازاسىن وتەۋشىلەرگە، اسىرەسە جۇمىس ىستەيتىندەرگە، سمارتفون قولدانۋعا مۇمكىندىك بەرىلۋى مۇمكىن. بۇل تۋرالى ىشكى ىستەر ءمينيسترىنىڭ ورىنباسارى سانجار ءادىلوۆ ماجىلىستە وتكەن بريفينگتە حابارلادى. مينيسترلىك سونىمەن قاتار ءبىرقاتار ماڭىزدى قىلمىستىق ىستەر بويىنشا تەرگەۋدىڭ جاي-جاپسارىن جانە ستالكەرلىككە قاتىستى ىستەردىڭ كوبەيگەنىن ايتتى.

بۇل تۋرالى Infohub.kz اقپارات اگەنتتىگى حابارلايدى.

كولونياداعىلارعا سمارتفون بەرىلە مە؟

جاڭا ەرەجەلەر تەك مەكەمەدەن تىس جەرلەردە ەڭبەك ەتەتىن سوتتالعاندارعا قاتىستى بولماق. ياعني، قۇرىلىس سياقتى نىسانداردا جۇمىس ىستەيتىن ازاماتتار مەكەمە وكىلدەرىمەن بايلانىستا بولۋ ءۇشىن ۇيالى تەلەفوندى پايدالانا الادى. ارينە، كەز كەلگەن زاڭسىز ارەكەتتەر قاتاڭ باقىلاۋدا بولادى.

بۇل باستاما بويىنشا بۇيرىق جوباسى «اشىق نپا» پورتالىندا جاريالانىپ، 11 ناۋرىزعا دەيىن قوعامدىق تالقىلاۋعا شىعارىلدى. سونىمەن قاتار، ءتارتىبى جاقسى سوتتالعاندار ءۇشىن «تىنىشتىق ساعاتىن» ەنگىزۋ جانە كەزدەسۋلەر مەن قالاعا شىعۋعا ءوتىنىش بەرۋ ءۇشىن تەرمينالداردى پايدالانۋ مۇمكىندىگى قاراستىرىلۋدا. بۇل شارالار سىبايلاس جەمقورلىق تاۋەكەلدەرىن ازايتۋعا باعىتتالعان.

استاناداعى تراگەديا مەن اتىراۋداعى ءىس

سانجار ءادىلوۆ استانادا تۇرعىن ءۇي كەشەنىنىڭ قاسبەتى قۇلاپ، فەلدشەر ۇلدانا مىرزۋاننىڭ قازا بولۋىنا قاتىستى تەرگەۋ جۇمىستارى تۋرالى دا ايتىپ ءوتتى. قازىرگى تاڭدا سوت-قۇرىلىس ساراپتاماسىنىڭ قورىتىندىسىن كۇتىپ وتىر. ول الىنعاننان كەيىن كىنالىلەر انىقتالىپ، ءتيىستى تەرگەۋ ارەكەتتەرى جۇرگىزىلەدى.

ال اتىراۋ وبلىسىندا ايتۆ-نى ادەيى جۇقتىرۋ فاكتىسى بويىنشا تەرگەۋ جالعاسۋدا. كۇدىكتى سوت سانكسياسىمەن ەكى ايعا قاماۋعا الىندى. قازىرگى ۋاقىتتا باسقا تۇلعالاردىڭ قاتىسى بار-جوعى انىقتالىپ جاتىر.

ىزدەۋدەگى كۇدىكتىلەر مەن ستالكەرلىك

بۇرىنعى سۋديا ايگۇل سايلىبايەۆانىڭ ولىمىنە قاتىستى قىلمىستىق ءىس بويىنشا تەرگەۋ كۇدىكتىلەردى ىزدەستىرۋگە بايلانىستى توقتاتىلعان. ىشكى ىستەر مينيسترلىگى رەسەي تاراپىمەن بەلسەندى جۇمىس جۇرگىزىپ جاتىر. باسقا ەلدەرمەن ءوزارا ءىس-قيمىل مەملەكەتتىك پروكۋراتۋرانىڭ قۇزىرەتىندە.

سونداي-اق، باتىس قازاقستان وبلىسىندا كامەلەتكە تولماعاندارمەن بايلانىسى بار ءىس بويىنشا كۇدىكتىنى بوساتىپ جىبەرگەن پوليسەيلەردىڭ جاۋاپكەرشىلىگى تەرگەۋ ناتيجەسىنە بايلانىستى بولادى. قىلمىستىق ءىستى توقتاتۋ تۋرالى شەشىمنىڭ كۇشىن جويۋ تۋرالى پروكۋراتۋراعا ۇسىنىس جاسالعان.

بۇعان قوسا، مينيسترلىك ستالكەرلىك تۋرالى جاڭا باپتىڭ قولدانىسقا ەنگىزىلگەنىنەن كەيىنگى العاشقى ناتيجەلەردى دە جاريالادى. 2025 جىلدىڭ 16 قىركۇيەگىنەن باستاپ سوتقا 36 قىلمىستىق ءىس جولدانعان. ستالكەرلىك ءۇشىن ايىپپۇل، قوعامدىق جۇمىستار نەمەسە قاماۋ تۇرىندەگى جازا كوزدەلگەن.