InfoHub Logo

ۋنيۆەرسيتەتتەر وبلىس ەكونوميكاسىنىڭ دامۋىنا ءوز ۇلەسىن قوسۋى كەرەك.

بۇل تۋرالى وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىن ارالاپ، تانىسۋ بارىسىندا ايتتى.

 

جوعارى وقۋ ورنىنىڭ تىنىس-تىرشىلىگىمەن تانىسىپ، ونداعى جاس عالىمداردىڭ عىلىمي جۇمىستارىنا قانىق بولعان اكىم، ونداعى ءبىلىم بەرۋ-اقپاراتتىق جانە ەلەكتروندى رەسۋرستىق ورتالىعى مەن ءتۇرلى زەرتحانالىق بولىمدەردى ارالادى. اتاپ ايتقاندا، ۋنيۆەرسيتەتتىڭ قۇرىلىس ماتەريالدارى، وسىمدىك شارۋاشىلىعى، تىگىن سەحى، مۇناي-گاز سالالارىنا قاتىستى ءبىرقاتار ورتالىقتارىن كورىپ، ستۋدەنتتەرمەن جانە وقىتۋشىلارمەن تىلدەستى.   

ءوڭىر باسشىسى جوعارى وقۋ ورنىنىڭ رەكتورى ج.مىرحالىقوۆقا جۇيەلى جۇمىس جۇرگىزۋدە ءبىرقاتار تاپسىرمالار جۇكتەدى. ماسەلەن، اكىم م.اۋەزوۆ اتىنداعى وقمۋ عالىمدارى وبلىستاعى ءوندىرىس ورىندارىندا جاڭا يننوۆاسيالىق تەحنولوگيالاردى ەندىرۋ باعىتىندا جۇمىس ىستەپ، جەرگىلىكتى تاۋارلاردى شىعارۋ ارقىلى ءوڭىر ەكونوميكاسىن دامىتۋ كەرەكتىگىن ايتتى. سونداي-اق، وڭتۇستىك قازاقستاندا شىعاتىن تابيعي قۇرىلىس ماتەريالدارىنىڭ كاتالوگىن جاساپ، ولاردى جەرگىلىكتى قۇرىلىستا كەڭىنەن پايدالانۋ ماسەلەسىنە اتسالىسۋ مەن جارىق ديودتاردىڭ تۇرلەرىن شىعارۋدى ويلاستىرۋ جايىن نۇسقادى.

بولاشاقتا شىمكەنت قالاسىندا ۇيىمداستىرىلاتىن اشىق مۇراجاي بايقاۋىنا اتالعان وقۋ ورنىنىڭ ۇجىمى مەن ستۋدەنتتەرىن بەلسەندى قاتىسۋعا شاقىرعان وبلىس اكىمى، بىرلەسكەن جۇمىستار ارقىلى ءوڭىرىمىزدى كوركەيتۋ كەرەكتىگىنە توقتالدى.

سونىمەن بىرگە، وقۋ ورنىن ارالاۋ كەزىندە ج.تۇيمەبايەۆ ۋنيۆەرسيتەتتىڭ «جەڭىل تاماق ونەركاسىبى»، «پەداگوگيكا جانە ونەر» فاكۋلتەتتەرىندە ءبىلىم الىپ جۇرگەن بولاشاق تىگىنشىلەرمەن، ديزاينەرلەرمەن تىلدەسىپ، ۇلتتىق ناقىشتاعى كيىمدەردىڭ تەك مەرەكەلىك كەشتەرگە ارنالعانىن عانا ەمەس، كۇندەلىكتى تۇرمىستا كيۋگە بولاتىن نۇسقالارىن تىگۋدى ۇسىندى. قازاق ۇلتتىق كيىمدەرىنىڭ ماۋسىمدىق تۇرلەرىنە دە نازار اۋدارۋ قاجەتتىگىنە توقتالعان ايماق باسشىسى، كيىم-كەشەكتەردى وتكىزۋ مەن تاپسىرىس بەرۋ ماسەلەسىندە اكىمدىك تاراپىنان بارىنشا قولداۋ بولاتىنىن جەتكىزدى.  

م.اۋەزوۆ اتىنداعى وقمۋ 65 جىلدان اسا تاريحى بار جوعارى تەحنيكالىق جانە گۋمانيتارلىق ءبىلىم بەرۋدىڭ ەكى ۇلكەن مەكتەبىنەن قۇرالادى. مۇندا 81 ماماندىق بويىنشا كۇندىزگى جانە سىرتقى وقۋ تۇرلەرىندە 20 مىڭعا جۋىق ستۋدەنت وقيدى.  قازىرگى كەزدە ۋنيۆەرسيتەتتە 1461 وقىتۋشى عىلىمي-پەداگوگيكالىق جۇمىسپەن اينالىسۋدا. ولاردىڭ ىشىندە 2 ۇلتتىق عىلىم اكادەمياسىنىڭ اكادەميگى، 117 عىلىم دوكتورى مەن پروفەسسورلار، 500-گە جۋىق عىلىم كانديداتى مەن دوسەنتتەر قىزمەت ەتەدى.

---