InfoHub Logo

الماتى قالاسىنىڭ پوليسەيلەرى «الەۋمەتتىك جەلىدە تانىسۋ» سحەماسى بويىنشا جاسالعان كەزەكتى توناۋ قىلمىسىن اشتى. بۇل تۋرالى Polisia.kz سايتىنا سىلتەمە جاساپ، infohub.kz حابارلايدى.

قىلمىسكەرلەردىڭ قۇربانى تانىسۋ سايتتارىنىڭ بىرىندە بويجەتكەنمەن تانىسقان ەر ادام بولعان. قىسقا ۋاقىت حات الماسقاننان كەيىن ولار جالدامالى پاتەردە كەزدەسۋگە كەلىسكەن.

الايدا، كەزدەسۋ كەزىندە پاتەرگە ءۇش ەر ادام باسىپ كىرگەن. ولار وزدەرىن قىزدىڭ «اعالارى» رەتىندە تانىستىرىپ، ونىڭ كامەلەتكە تولماعانىن مالىمدەگەن.

وسى سىلتاۋدى پايدالانعان الاياقتار جابىرلەنۋشىدەن اقشا بوپسالاي باستاعان، سونداي-اق ونىڭ تەلەفونى مەن باسقا دا باعالى زاتتارىن تارتىپ العان.

پوليسيا قىزمەتكەرلەرى جۇرگىزگەن جەدەل-ىزدەستىرۋ شارالارىنىڭ ناتيجەسىندە قىلمىسقا قاتىسقانداردىڭ بارلىعى انىقتالىپ، ۇستالدى. ولار ۋاقىتشا ۇستاۋ يزولياتورىنا قامالدى.

«وكىنىشكە وراي، مۇنداي جاعدايلار ءجيى كەزدەسەدى. ءبىز ازاماتتاردى ينتەرنەتتە تانىسقان كەزدە اسا ساق بولۋعا، كۇماندى جەرلەردە كەزدەسۋگە كەلىسپەۋگە جانە تەك حات الماسۋ ارقىلى بىلەتىن ادامدارعا سەنبەۋگە شاقىرامىز»، - دەپ اتاپ ءوتتى الماتى قالاسى المالى اۋداندىق پب جانىنداعى پوليسيا ءبولىمىنىڭ باستىعى تيمۋر يمانبەكوۆ.