InfoHub Logo

قازاقستان پرەمەر-مينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ەنەرگەتيكا ينفراقۇرىلىمىن جاڭعىرتۋ جانە الداعى جىلىتۋ ماۋسىمىنا دايىندىق ماسەلەلەرى قارالدى. وتىرىس بارىسىندا وتكەن جىلىتۋ كەزەڭىنىڭ قورىتىندىلارى مەن الداعى ماۋسىمعا دايىندىق بارىسى تالقىلانىپ، ەنەرگەتيكالىق نىساندار مەن جەلىلەردى جوندەۋگە جانە جاڭارتۋعا ۇكىمەت رەزەرۆىنەن 25 ميلليارد تەڭگەدەن استام قارجى ءبولۋ تۋرالى شەشىم قابىلداندى.

بۇل تۋرالى Infohub.kz اقپارات اگەنتتىگى حابارلايدى.

جىلىتۋ ماۋسىمىنا دايىندىق باستى نازاردا

ەنەرگەتيكا ۆيسە-مينيسترى سۇڭعات ەسىمحانوۆ، KEGOC كومپانياسى باسقارما ءتوراعاسى ءنابي ايتجانوۆ، «سامۇرىق-ەنەرگو» باسقارما ءتوراعاسى قايرات ماقسۇتوۆ، سونداي-اق قاراعاندى، ماڭعىستاۋ، باتىس قازاقستان جانە جامبىل وبلىستارىنىڭ اكىمدەرى بايانداما جاسادى. وتكەن جىلىتۋ ماۋسىمىنىڭ ەشقانداي ءىرى اۆارياسىز اياقتالعانى اتاپ ءوتىلدى. ەلەكتر ستانسيالارىنداعى تەحنولوگيالىق بۇزۋشىلىقتاردىڭ سانى 15%-عا ازايعان. سونىمەن قاتار، ەلەكتر ەنەرگياسىن وندىرۋدە تاريحي رەكورد ورناتىلىپ، شامامەن 17 مىڭ مۆت-قا جەتكەن، بۇل وتكەن جىلىتۋ كەزەڭىمەن سالىستىرعاندا 7%-عا جوعارى.

ينفراقۇرىلىمدى جاڭعىرتۋعا مول قارجى بولىنۋدە

پرەمەر-مينيستر ەنەرگەتيكا ينفراقۇرىلىمى مەن كوممۋنالدىق شارۋاشىلىقتى جاڭعىرتۋدىڭ ماڭىزدىلىعىن ايتىپ، «ءتاريفتى ينۆەستيسياعا ايىرباستاۋ» باعدارلاماسى اياسىندا ەلەكتر ستانسيالارىن جوندەۋگە جانە جاڭعىرتۋعا بيىل 384 ميلليارد تەڭگەگە جۋىق قارجى قاراستىرىلعانىن مالىمدەدى. بۇل وتكەن جىلدان 9%-عا ارتىق. ەلدىڭ ەنەرگەتيكا ينفراقۇرىلىمىن جاڭعىرتۋ جونىندەگى ۇلتتىق جوبا بەلسەندى جۇزەگە اسىرىلۋدا. بيىل 130 شاقىرىم جىلۋ جەلىسى مەن 10،5 مىڭ شاقىرىم ەلەكترمەن جابدىقتاۋ جەلىسىن جاڭعىرتۋ جوسپارلانعان. بۇل جۇمىستار اتالعان جەلىلەردىڭ توزۋىن تيىسىنشە 48%-عا جانە 62%-عا دەيىن ازايتۋعا مۇمكىندىك بەرەدى.

جوندەۋ جۇمىستارىن قارجىلاندىرۋدا كەمشىلىككە جول بەرىلمەۋى ءتيىس

ۇكىمەت باسشىسى سالالىق ۆەدومستۆولار مەن اكىمدىكتەردىڭ نازارىن جوندەۋ جۇمىستارىنىڭ كولەمىن جانە ولاردى قارجىلاندىرۋدى قىسقارتۋعا جول بەرمەۋ قاجەتتىگىنە اۋداردى. مۇنداي جاعدايلار ورىن السا، مەنشىك يەلەرى مەن باسقارۋشى كومپانيالارعا قاتىستى شارالار قابىلداناتىنى ەسكەرتىلدى. KEGOC كومپانياسىنا جانە ەنەرگەتيكا مينيسترلىگىنە مامىردىڭ 25-ىنە دەيىن ۇلتتىق ماڭىزى بار ستانسيالار ءۇشىن جابدىقتاردىڭ جۇمىس رەجيمدەرىن بەكىتۋ تاپسىرىلدى.

وڭىرلەردىڭ جاۋاپكەرشىلىگى

وڭىرلەر الداعى جىلىتۋ ماۋسىمىنا ساپالى ءارى ۋاقتىلى دايىندىقتى قامتاماسىز ەتۋى ءتيىس. ەنەرگيا كوزدەرى مەن ينجەنەرلىك جەلىلەردى جوندەۋ جانە جاڭعىرتۋ جۇمىستارى جوسپارلى تۇردە، بەلگىلەنگەن مەرزىمدەردە ورىندالۋى قاجەت. جىلۋ جەلىلەرىن سىناۋعا ەرەكشە نازار اۋدارىلۋى كەرەك. بولىنگەن قاراجاتتىڭ ءتيىمدى پايدالانىلۋىن جانە جۇمىستاردىڭ ۋاقتىلى اياقتالۋىن قاتاڭ باقىلاۋ قاجەتتىگىن پرەمەر-مينيستر اتاپ ءوتتى. جىلىتۋ ماۋسىمىنا دايىندىق پاسپورتتارىن الماعان ءوڭىر اكىمدەرى جەكە جاۋاپكەرشىلىككە تارتىلادى.

قارجىلاندىرۋ جانە مەرزىمدەر

جەتىسۋ، اباي، اقمولا جانە شىعىس قازاقستان وبلىستارىنداعى نىسانداردى جاڭعىرتۋعا جانە ءتورت وڭىردەگى 30 شاقىرىمعا جۋىق جىلۋ جەلىلەرىن جوندەۋگە 25 ميلليارد تەڭگەدەن استام قارجى باعىتتالادى. اكىمدىكتەرگە ەكى اپتا ىشىندە بارلىق كونكۋرستىق راسىمدەردى وتكىزىپ، جوندەۋ جۇمىستارىن باستاۋ تاپسىرىلدى. جىلۋمەن جابدىقتاۋ وبەكتىلەرىن جوندەۋ جۇمىستارى تامىز ايىنىڭ سوڭىنا دەيىن اياقتالۋى ءتيىس. ءبىلىم بەرۋ جانە دەنساۋلىق ساقتاۋ وبەكتىلەرى قىركۇيەكتىڭ 1-ىنە دەيىن، ال سولتۇستىك، ورتالىق جانە شىعىس وڭىرلەردەگى ينجەنەرلىك ينفراقۇرىلىم مەن تۇرعىن ۇي-كوممۋنالدىق شارۋاشىلىق وبەكتىلەرى قىركۇيەكتىڭ 15-ىنە دەيىن، باسقا وڭىرلەردە قازاننىڭ 15-ىنە دەيىن تولىق دايىن بولۋى كەرەك. اكىمدەرگە بۇل جاعدايدى ۇنەمى نىساندارعا بارىپ، جەكە باقىلاۋدا ۇستاۋ تاپسىرىلدى.

ەنەرگەتيكا مينيسترلىگى، كولىك مينيسترلىگى جانە اكىمدىكتەرگە قىركۇيەكتىڭ 1-ىنە دەيىن جىلۋ كوزدەرىندە جانە تۇيىقتاردا وتىن قورىن ۋاقتىلى جيناقتاۋدى قامتاماسىز ەتۋ تاپسىرىلدى.