InfoHub Logo

قازاقستان رەسپۋبليكاسىنىڭ ۇلتتىق بانكى 2026 جىلعى فۋتبولدان الەم چەمپيوناتىنىڭ قۇرمەتىنە ارنالعان كوللەكسيالىق مونەتالاردى اينالىمعا ەنگىزەدى. اتالعان مونەتالاردىڭ سانى شەكتەۋلى.

بۇل تۋرالى Infohub.kz اقپارات اگەنتتىگى حابارلايدى.

فۋتبولدان الەم چەمپيوناتى-2026

ۇلتتىق بانكتىڭ باسپا ءسوز قىزمەتى حابارلاعانداي، 5 مامىردان باستاپ «سپورت» سەرياسى بويىنشا FIFA World Cup 2026 كوللەكسيالىق كۇمىس مونەتالارى ساتىلىمعا شىعارىلادى. مونەتالار 925 سىنامالى كۇمىستەن جاسالعان، التىنمەن قاپتالعان، ديامەترى 37 مم، سالماعى 20 گرامم جانە «proof» ساپاسىندا دايىندالعان. ونىڭ نومينالى – 1000 تەڭگە.

مونەتانىڭ ريەۆەرسىندە چەمپيوناتتى قابىلدايتىن كانادا، اقش جانە مەكسيكا ەلدەرىنىڭ تۋلارى بەينەلەنگەن. ورتاسىندا «FIFA WORLD CUP 26 TM» جازۋى بار، جەر شارىنىڭ سۋرەتى سالىنعان. تومەنگى جاعىندا FIFA كۋبوگى، ال ەكى جاعىندا فۋتبول الاڭىنداعى ويىنشىلاردىڭ سيلۋەتتەرى ورنالاسقان.

قازاقستاننىڭ ىشكى نارىعىنا ارنالعان مونەتالاردىڭ سانى – 1500 دانا، ال سىرتقى نارىققا ارنالعانى – 500 دانا. بۇل مونەتالار ەل اۋماعىنداعى بارلىق تولەم تۇرلەرى بويىنشا، سونداي-اق بانك شوتتارىنا اۋدارۋ، بانكتەردە ايىرباستاۋ جانە اۋىستىرۋ ءۇشىن نومينالدىق قۇنىمەن قابىلدانادى.

چەمپيونات تۋرالى

2026 جىلعى فۋتبولدان الەم چەمپيوناتى – بۇل الەمدەگى ەڭ ءىرى فۋتبول ءتۋرنيرى. ول اقش، كانادا جانە مەكسيكا ەلدەرىندە وتەدى. بۇل تۋرنيردە العاش رەت 48 كوماندا قاتىسادى. ويىن 11 ماۋسىم مەن 19 شىلدە ارالىعىندا وتەدى دەپ جوسپارلانعان.