InfoHub Logo

تاقىرىبى: ۇقىپتى بالا – ادەپتى بالا
قۇندىلىق: دۇرىس ارەكەت
ساباقتىڭ ماقساتى: وقۋشىلاردىڭ ىشكى جان دۇنيەسىندە جالقاۋلىقتى قاداعالاي ءبىلۋ، ۇقىپتىلىق، تازالىق، شىدامدىلىق قۇندىلىق رەتىندە ءمانىن اشۋ.
مىندەتتەرى:
ا) بىلىمدىلىك: وقۋشىلارعا جالقاۋلىقتى قاداعالاي ءبىلۋ، ءتىلالعىش بولۋ تۋرالى تۇسىنىك بەرۋ؛
ب) دامىتۋشىلىق: وقۋشىلار بويىندا ۇستازداردى سىيلاۋ، ۇقىپتى بولۋ قاسيەتىن دامىتۋ؛
ۆ) تاربيەلىك: وقۋشىلاردى دەنساۋلىقتى ساقتاي وتىرىپ، تازالىققا تاربيەلەۋ

ساباق بارىسى:
1. ۇيىمداستىرۋ كەزەڭi. تىنىشتىق ءساتi. نۇرعا بولەنۋ.
ىڭعايلانىپ وتىرىڭىزدار، دەنەلەرىڭىزدى
ءتۇزۋ ۇستاڭىزدار. اياق قولىڭىزدى ايقاستىرماڭىزدار. قولدارىڭىزدى تىزەڭىزگە نەمەسە ۇستەلگە قويۋعا بولادى. كوزدەرىڭىزدى جۇمىپ، ەلەستەتىپ كورىڭىز: كۇن نۇرى ءسىزدىڭ توبەڭىزدەن ءوتىپ، كەۋدەڭىزگە قاراي بويلاپ بارادى. كەۋدەڭىزدىڭ ورتا تۇسىندا گۇل تۇينەگى ورنالاسقان. گۇلدىڭ تۇينەگى نۇردان باياۋ اشىلىپ كەلەدى. بالعىن جانە تازا اسەمگۇل ءسىزدىڭ ءار ويىڭىزدى، ءار سەزىمىڭىزدى، ەموسياڭىز بەن تىلەك - قالاۋىڭىزدى شايىپ جۇرەگىڭىزدىڭ كوزىن اشتى. نۇر ساۋلەسى ءسىزدىڭ بويىڭىزعا اقىرىن تاراي باستاعانىن ەلەستەتىڭىز. ول بىرتىندەپ كۇشەيە تۇسۋدە. ويمەن وسى نۇردى قولدارىڭىزعا ءتۇسىرىڭىز. ءسىزدىڭ قولدارىڭىز نۇرعا بولەنىپ، ساۋلە شاشۋدا. قولىمىز تەك جاقسى، يگى ىستەر ىستەيدى جانە بارشاعا كومەكتەسەدى. ەندى، نۇر اياقتارىڭىزعا تارادى. اياقتارىڭىز نۇر ساۋلەسىن شاشۋدا. ولار ءسىزدى تەك جاقسىلىق جاساۋ ءۇشىن جاقسى جەرلەرگە اپارادى. ولار نۇر مەن ماحاببات قۇرالىنا اينالدى. ودان ءارى نۇر ءسىزدىڭ اۋزىڭىزعا تارادى. ءتىلىڭىز تەك شىندىقتى جانە جاقسى، ىزگى سوزدەر عانا ايتادى. نۇردى قۇلاقتارىڭىزعا باعىتتاڭىز، قۇلاقتارىڭىز تەك جاقسى ءسوز بەن اسەم اۋەندى عانا ەستيدى. نۇر كوزدەرىمىزگە دە جەتتى، كوزىمىز تەك جاقسىعا قاراپ،
بارىنەن جاقسىلىقتى عانا كورەدى. ءسىزدىڭ باسىڭىز تۇگەلدەي نۇرعا بولەنىپ، باسىڭىزعا تەك ىزگى ساۋلەلى وي كەلەدى. نۇر بىرتە - بىرتە كۇشەيە باستايدى، ءسىزدىڭ
دەنەڭىزدەن تاراپ، جان - جاعىڭىزعا ساۋلە شاشادى. وسى نۇردى تۋىسقاندارىڭىزعا، مۇعالىمدەرىڭىزگە، دوستارىڭىزعا، تانىستارىڭىزعا باعىتتاڭىز. نۇردى ۋاقىتشا تۇسىنىسپەي، رەنجىسىپ جۇرگەن ادامدارعا دا باعىتتاڭىز، ولاردىڭ دا جۇرەگى نۇرعا
تولسىن. وسى نۇر بۇكىل الەمگە: بارلىق ادامدارعا، جان - جانۋارلارعا،
وسىمدىكتەرگە، بارلىق ءتىرى جانعا تارالسىن... عالامنىڭ بارلىق تۇكپىر - تۇكپىرىنە
نۇر باعىتتاڭىز. ويشا ايتىڭىز: «مەن نۇرلىمىن... نۇر مەنىڭ ىشىمدە... مەن نۇرمىن...». وسىنداي نۇر، ماحاببات جانە تىنىشتىق كۇيىندە وتىرا تۇرىڭىز... ەندى
نۇردى جۇرەگىڭىزگە ورنالاستىرىڭىز. نۇرعا تولى بۇكىل الەم ءسىزدىڭ جۇرەگىڭىزدە. ونى
وسىنداي اسەم قالىپتا ساقتاڭىز. جايمەن كوزدى اشۋعا بولادى.

2. ءۇي تاپسىرماسىن تەكسەرۋ: ە. وتەتىلەۋوۆ «ۇقىپتىلىق» اڭگىمەسىن وقىپ كەلۋ
1. اسىلاننىڭ ۇقىپتىلىعىن نەدەن بايقاۋعا بولادى؟
2. جومارت نەلىكتەن قورىققا بارماي قالدى؟
3. «ۇقىپتىنىڭ ۋاقىتى مول» دەگەندى قالاي تۇسىنەسىزدەر؟
4. سەندەر ءوز ۋاقىتتارىڭدى قالاي پايدالاناسىڭدار؟

3. دايەكسوز.
ۇقىپتىنىڭ ۋاقىتى مول
م. الىمبايەۆ
1. دايەكسوزدىڭ ماعىناسىن قالاي تۇسىنەسىڭدەر؟
2. ۇقىپتى بولۋ بارلىقتارىڭنىڭ قولدارىنان كەلەدى مە؟
3. ۇقىپتى وقۋشى قانداي قاسيەتتەرگە يە؟
4. ءوز ىسىڭە قالاي ۇقىپتى بولۋعا بولادى؟
5. جۇمىس كەستەسىن قۇرۋعا، الدىن الا جوسپارلاۋعا بولادى ما؟

4. اڭگىمەلەسۋ، سۇحبات. «ءمۇعالىم سىيى»
ءبىر اپتادا
م. جامانبالينوۆ
ءبىر اپتانىڭ كۇندەرى ءوتتى
دۇيسەنبىدە گۇلدەر ەكتىم
سەيسەنبىدە جۋا تەردىم
سارسەنبىدە سۋ اكەلدىم
بەيسەنبىدە باقشا باپتاپ،
جۇما كۇنى تاقپاق جاتتاپ،
سەنبىدە مەن كينو باردىم،
جەكسەنبىدە ءبىر دەمالدىم.

1. ءبىر اپتادا بۇدان دا كوپ شارۋا بىتىرۋگە بولادى ما؟
2. اپتانىڭ كۇندەرىنە كەستە قۇرعان دۇرىس پا؟
3. تالاپتان دا اقىل مەن ونەر ۇيرەن دەگەندى قالاي تۇسىنەسىزدەر؟
4. ەڭبەكقورلىق پەن جالقاۋلىقتىڭ قانداي ايىرماشىلىعى بار؟

5. شىعارماشىلىق ءىس - ارەكەت، توپتىق
جۇمىس
وقۋشىلاردى سۋرەتتەر ارقىلى 3توپقا ءبولۋ.
1 - توپقا: «مەن ۇقىپتى بالامىن» تاقىرىبىندا سۋرەت سالۋ، سۋرەت جايلى اڭگىمەلەپ بەرۋ
2 - توپقا: وزدەرىڭ ادەپتىلىك ەرەجەسىن قۇراستىرىڭدار
3 - توپقا: «ۇقىپتى قىز» ەرتەگىسىن اياقتاۋ

6. توپپەن ءان ايتۋ

ءسوزى: س. مولداسان ۇلى
ءانى: ف. لۇقپانوۆا
«بالا تىلەگى»
بال - بالالىق، بالدىرعان شاق سان ارمان،
بارلىق بالا ارمانداۋعا جارالعان.
كەل، دوستارىم، اندەتىڭدەر، بيلەڭدەر،
گۇلدەنسىن دەپ اتامەكەن قارا ورمان.

بولاشاقتىڭ يەسىمىز ءبارىمىز،
تۋعان جەردىڭ تۇرلەندىرەر ءنارىمىز.
التىن بەسىك - ۇلان بايتاق ەلىمدە،
جارقىن بولسىن شىرقاپ ايتار ءانىمىز.

قالىقتاعان كوگەرشىنى كوگىندە،
مۇڭايماسىن ەشبىر بالا ەلىمدە.
اتا بەرگەن باتامەنەن كوركەيسىن،
ۇلى وتانىم، تىلەگىم سول مەنىڭ دە.
7. كەرى بايلانىس
ساباقتان العان اسەرلەرىڭىزدى بولىسىڭىزدەر. ستيكەرلەرگە ءوز پىكىرلەرىن ءبىلدىرۋ.

وقو، كەنتاۋ قالاسى،
ب. مومىش ۇلى اتىنداعى №12 جالپى ورتا مەكتەبى
ءوزىن - ءوزى تانۋ ءپانىنىڭ ماگيستر - وقىتۋشىسى
ۋستەميروۆا باتيا بەكتەمىر قىزى

تولىق نۇسقاسىن جۇكتەۋ