InfoHub Logo

تاربيە ساعاتىنىڭ تاقىرىبى: ۇرپاققا ۇلگى بولعان ەرلىك
ماقساتى:
بىلىمدىلىگى: اۋعان سوعىسىنىڭ تاريحي ماعىناسىن اشىپ، وقۋشىلارعا ءتۇسىندىرۋ.
“اۋعان سوعىسى” جايلى تەرەڭىرەك ءبىلىپ تانۋ، سوعىس ارداگەرلەرى تۋرالى مالىمەت الۋ.
دامىتۋشىلىق: تاريحي دەرەكتەردىڭ ماڭىزدىسىن اشا بىلۋگە جانە ماتەريالداردى ديالەكتيكالىق تۇرعىدان تالداي بىلۋگە داعدىلاندىرۋ.
تاربيەلىك: اۋعان سوعىسىنىڭ ارداگەرلەرىن قۇرمەتتەۋ، جاس ۇرپاقتىڭ پاتريوتتىق سەزىمدەرىن وياتىپ، وتان ءۇشىن وتقا ءتۇسىپ قىرشىنىنان قيىلعان، جات جەردە كوز جۇمعان قازاقستان ازاماتتارىن ەسكە الۋ، جاۋىنگەرلەردىڭ قىسقا عۇمىرىنان ۇلگى - ونەگە، تاريحي تاعىلىم بەرۋ، وقۋشىلاردىڭ سويلەۋ مادەنيەتىن دامىتۋ، ەلجاندىلىققا، وتانسۇيگىشتىككە، ىزگىلىككە باۋلي وتىرىپ تاربيە بەرۋ.
كورنەكىلىگى: تاقىرىپقا ساي سلايد، ينتەراكتيۆتىك تاقتا

تۇرسىنبەك:
سوعىس - جان الىپ، جان بەرۋ.
سوعىس - حالىقتىڭ باسىنا كەلگەن قاسىرەت، جۇت.
كەڭەس اسكەرلەرىنىڭ اۋعان جەرىنەن شىعارىلعانىنا 26 جىل تولۋىنا بايلانىستى
«ۇرپاققا ۇلگى بولعان ەرلىك» تاقىرىبىنداعى تاربيە ساعاتىمىزدى اشىق دەپ جاريالايمىز.

ساندۋعاش:
اۋعانستان... ءبىز ول تۋرالى ءبىز نە بىلەمىز؟ اۋعانستان بۇل - ەرتەدەن قالىپتاسقان مۇسىلمان مەملەكەتى. ءبىراق بۇل ەل بىزگە ۇمىتىلماس قايعى مەن قاسىرەت اكەلەدى دەپ ەشقاشان ويلاعان ەمەسپىز. بىرەۋدىڭ جۇرەك جارار ۇلىن، بىرەۋدىڭ ارقا سۇيەر باۋىرىن جۇلىپ اكەتەرىن كىم بىلگەن؟!

تۇرسىنبەك:
اۋعان سوعىسى — كسرو قارۋلى كۇشتەرىنىڭ اۋعانستانعا باسىپ كىرىپ، ونىڭ ىشكى ىستەرىنە قول سۇعۋى سالدارىنان تۇتانعان سوعىس. كوكپ جانە كسرو باسشىلىعى اۋعانستانداعى 1978 جىلعى ءساۋىر توڭكەرىسى ناتيجەسىندە بيلىككە كەلگەن “حالىقتىق - دەموكراتيالىق ۇكىمەتتى” قولداپ، كورشىلەس ەلدىڭ سوسياليستىك باعىتپەن دامۋىن كوزدەپ، “ينتەرناسيونالدىق اسكەري جاردەم بەرەمىز” دەگەن جەلەۋمەن ونىڭ ىشكى ىستەرىنە ارالاستى. بۇل “قىرعي قاباق سوعىس” كەزەڭى وتكەننەن كەيىنگى ۋاقىتتا دا كسرو - نىڭ وزگە ەلدەردى ءوز ىقپالىنا قاراتۋ ساياساتىنىڭ ايقىن كورىنىسى ەدى.

1 - وقۋشى - شارافات
نە بولدى ەكەن، كوڭىلىم تىنشىمايدى،
كىم بولدى ەكەن باساتىن گۇل شىرايدى.
ەندى عانا نۇرلانعان بۇل ءومىردىڭ
اق جولىنان الىستا ءجۇرشى، قايعى.؟!
ءۇزىلدى گۇل بۇرشىك اتقان جاڭادان،
قيىلدى ءومىر، ەندى عانا جاڭارعان.
ناز كوڭىلدەر سۋ سەپكەندەي باسىلدى،
توگىلدى جاس جابىرقاۋلى جاناردان.
سوعىپ ءوتتى تىرشىلىكتىڭ ىزعارى
بولعانى عوي... وسى ءومىردى بۇزعانى.
سۋىق لەبى جۇرەككە كەپ ورنادى،
ءبىراق بۇل ءسات ۋاقىتىنان وزبادى.
الەمگە ورتاق اسپان دا، جۇلدىز، اي دا، كۇن...
قۋانىش تا كوپ، قايعىمىز دا كوپ ايتاتىن.
ءبارى دە ورتاق، تەك شەكارالار ارادا
اتتەڭ، تەك سودان كوڭىلىم مەنىڭ قايتاتىن.
تالاسسىن تاڭى، كۇنمەنەن بىرگە شاعىلسىن،
بەيبىتشىلىكتىڭ جۇلدىزى كوكتەن جاعىلسىن.
جۇدىرىقتاي بوپ جۇمىلعان جۇمىر جەرىمنىڭ
باسىنان تايسىن بار جاماندىعى ارىلسىن.
الەمنىڭ جانى، ءبىر بولسا ەكەن، تىلەگى،
تەك بەيبىتشىلىك دەپ سوقسا ەكەن جۇرەگى.
قيىنشىلىقتا بىرىنە - ءبىرى سۇيەنىش،
بولسا ەكەن دەيمىن قولداۋشى ءارى تىرەگى.
قازاقستانىم، كوگەرسىن، گۇل بوپ جايناسىن،
ەل - جۇرتىڭ كۇنىن بەيبىتشىلىكتىڭ تويلاسىن.
2030، ودان دا ءارى ماڭگىلىك
باسىڭنان باعىڭ، قاسىڭنان قۇتىڭ تايماسىن.

2 - وقۋشى - اقارىس
ۇمىتپايدى ارتتا قالعان ۇرپاعىڭ
ەسكە الادى جىل سايىن
ءومىر ءۇشىن ورتەنىپ كەتكەندەردى.
ال بۇگىندە ماقتان ەتەر ۇرپاقتارى
جەڭىس الىپ ەلىنە جەتكەندەردى.
تىنىشتىق بوپ ماڭگى وسىلاي تۇرسا كۇن،
جاس ءبۇلدىرشىن جاعا بەرەر جىر شامىن.
سۇيەم سەنى، قاسيەتتى مەكەنىم،
ماڭگى سەنى انمەن جەلپىپ وتەمىن.
سەندە عانا كوتەرىلەم بيىككە،
سەندە عانا ارمانىما جەتەمىن..

تۇرسىنبەك:
1979 جىلى اۋعانستان جەرىندە بولعان زۇلمات سوعىستا كەڭەس اسكەرلەرى قايتالانباس قاھارماندىق تانىتتى. مەيلى وزگە ەلدە بولسىن، حالىقتىڭ تىنىشتىعىن قالاعان باتىرلارىمىزدىڭ باسىم بولىگى سول ءبىر سۇم جىلداردا مايدان دالاسىندا قازا تاپسا، تاعى ءبىرى ءىز - ءتۇسسىز جوعالىپ كەتتى.

ساندۋعاش:
بيىلعى جىلى كەڭەس اسكەرلەرىنىڭ اۋعان جەرىنەن شىعارىلعانىنا 26 جىل تولىپ وتىر. اۋعان سوعىسىنىڭ قاندى قىرعىنىنان امان – ەسەن ورالعانىمەن، جاندارى جارالى 18 مىڭنان استام قازاقستاندىق ارداگەر ورتامىزدا ءجۇر. ولاردىڭ دۇشپان وعىنان قازا تاپقان مايدانداس دوستارىن سوڭعى ساپارعا شىعارىپ سالىپ تۇرىپ، كوزدەرى جاسقا، جۇرەكتەرى مۇڭعا تولعان شاقتارى كوپ. سوندا دا اتا - بابا رۋحىنا داق تۇسىرمەي ەلگە ابىرويمەن ورالدى. مايدان دالاسىندا جانقيارلىق پەن قاھارماندىعى ءۇشىن ون مىڭداعان قازاقستاندىق وردەن - مەدالدارمەن ماراپاتتالدى.
ۇرپاققا ۇلگى بولعان ەرلىك جۇكتەۋ