InfoHub Logo

ۇيقى بەزى ادام ورگانيزمىندە، اسىرەسە اس قورىتۋدا، ماڭىزدى ءرول اتقارادى. سوندا ۇيقى بەزىنىڭ قابىنۋى نەندەي دەرت؟

ۇيقى بەزىن اناتوميالىق قۇرىلىمىنا قاراپ باسى، ورتا دەنەسى جانە قۇيرىعى دەپ ۇشكە بولەمىز. بەز جاسۋشالارى وندىرەتىن فەرمەنت تۇتىك جولىمەن ۇلتابارعا قۇيىلادى. ءسويتىپ، اس قورىتۋ ۇدەرىسىنە بەلسەنە قاتىسادى. بەز ىسىنگەندە نەمەسە جارالانىپ، ىشىنە قان قۇيىلعاندا ونىڭ كەيبىر جەرلەرى ءجيدىپ ولە باستاعاندا (نەكروز) ۇيقى بەزى قابىنىپ، قاتتى اۋىرادى. اۋرۋ بەزدى تۇتاستاي نەمەسە ونىڭ كەيبىر جەرلەرىن عانا (باسىن، دەنەسىن، قۇيرىعىن) قامتۋى مۇمكىن.

ءجىتى پانكرەاتيتتى كوبىنەسە ميكروبتار قوزدىرادى، ءبىراق اۋرۋ كەيدە ونسىز دا باستالادى. قابىنۋ كۇشى جانە اۋرۋدىڭ بارىسى سول قوزدىرعىش تەتىگىنە بايلانىستى.ۇيقى بەزىنىڭ قابىنۋى ءارقاشان شىداتپاي، قاتتى اۋىرىپ باستالادى. اۋىرۋ ءىشتىڭ جوعارعى (ۇيقى بەزىنىڭ تۇسى) بولىگىندە بولادى. قاتتى اۋىرعاندىعى سونشا، كەيدە ادام دوڭبەكشىپ، ەسىنەن دە تانادى. ءوڭى قاشىپ، قول-اياقتارى كوگەرە باستايدى. ارتەريالىق قان قىسىمى تومەندەيدى. تامىر سوعۋى ناشارلايدى. اۋىرعانى باسىلماي، ادامنىڭ جوتاسىنا تارالادى. ارقاسىن بەلبەۋدەي ورايدى. ۇيقى بەزى قابىنعان ادامنىڭ ۇستاماسى كەلگەندە قۇسا باستايدى. راس، دەنە ىستىعى قالىپتان اسپاۋى مۇمكىن، ءبىراق ادامنىڭ جالپى ءحالى ناشارلايدى. كەيدە جاتا دا الماي، تەك قيسايىپ قانا وتىرادى. ۇيقى بەزىنىڭ قابىنۋىنا ءوت جولىنىڭ قابىنۋى قوسىلسا، ادامنىڭ دەنەسى سارعايۋى مۇمكىن. ءبىرقاتار اۋرۋلاردىڭ تىنىس الۋى بۇزىلادى، كەيبىرەۋلەردىڭ ىشەكتەرى قىزمەتىن دۇرىس اتقارا المايدى، ۇلكەن دارەتى جۇرمەي قالادى. سوندىقتان، وسىنداي حالگە ۇشىراعان ادامدى كەشىكتىرمەي اۋرۋحاناعا جەتكىزگەن نەمەسە جەدەل جاردەمدى شاقىرعان ءجون. اۋرۋ ۇستاماسى ۇيقى بەزى ىسىنگەننەن پايدا بولسا، وندا ونى دارى-دارمەكپەن ەمدەۋگە بولادى. اۋىرعان جەرگە مۇز باسىپ، ەكى بۇيىردەن ەگۋ (بلوكادا) جاساعان پايدالى. مۇندايدا ەمدام ساقتاپ، ادامعا اشىعۋ دا كەرەك، قان تامىرىنا نوۆوكاين، اتروپين ەنگىزگەن ءتيىمدى. ال بەز ءجيدىپ، ولەتتەنسە، ياعني ىرىڭدەسە، وندا سىرقات وتاعا ءزارۋ دەگەن ءسوز.

د.س. بايىرحانوۆا، تەراپيەۆت-دارىگەر

---