InfoHub Logo

اتىراۋداعى سوت وتىرىسىندا سۇلتان سارسەمالييەۆكە قاتىستى ءىس بويىنشا جابىرلەنۋشىلەردىڭ تۋىستارى مارقۇم بولعان جاقىندارىنىڭ تەلەفوندارىنان حابارلامالار مەن اۋديوجازبالار كەلگەنىن مالىمدەدى. بۇل جاعداي، مارقۇمدار ءالى ءتىرى جۇرگەندەي اسەر قالدىرعان.

بۇل تۋرالى Infohub.kz اقپارات اگەنتتىگى حابارلايدى.

مارقۇمنىڭ اتىنان كەلگەن اۋديوجازبا

اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا مارقۇم ءناسىپ وتەشقالييەۆانىڭ اعاسى تىلەكقابىل وتەشقالييەۆ كۋالىك ەتتى. ونىڭ ايتۋىنشا، وتكەن جىلدىڭ 7 قاراشاسىندا وتباسىلىق WhatsApp توبىنا قارىنداسىنىڭ نومىرىنەن اۋديوحابارلاما تۇسكەن. حابارلامادا تۋىستاردىڭ جاعدايى، دەنساۋلىعى جانە كۇندەلىكتى تىرشىلىگى تۋرالى سۇراقتار بولعان.

“بۇل ونىڭ كوزى تىرىسىندە جازىلعان ەسكى اۋديو بولۋى مۇمكىن”، – دەدى تىلەكقابىل وتەشقالييەۆ سوتتا.

WhatsApp ارقىلى الداۋ

بۇعان دەيىن ناۋرىز مۇقانعالييەۆتىڭ تاتەسى شيلماعامبەتوۆا دا سوتتا جيەنىنە حابارلاسا الماعانىن، ءبىراق WhatsApp ارقىلى حابارلامالار العانىن ايتقان ەدى. ونىڭ سوزىنشە، ناۋرىزدىڭ اتىنان تۋىستارىنا اناسىنىڭ دەنساۋلىعى ناشارلاپ، ونى ەمدەتۋ ءۇشىن تاشكەنتكە الىپ كەتكەنى جازىلعان. سونداي-اق، ەمگە اقشا قاجەت بولعاندىقتان، ۇيدەگى مال ساتىلا باستاعانى تۋرالى حابارلامالار كەلگەن.

قارجىلىق شىعىن

ايىپتاۋ اكتىسىنە سايكەس، ماقسوت قارابالينگە تيەسىلى 17 قوي 950 مىڭ تەڭگەگە ساتىلعان. ال ناۋرىز مۇقانعالييەۆتىڭ اتىنان تاعى ەكى سيىر 500 مىڭ تەڭگەگە وتكىزىلگەن. بۇدان بولەك، ايىپتاۋ تارابىنىڭ مالىمەتىنشە، سارسەمالييەۆ مارقۇم تۋىستارىنىڭ بانك كارتالارىن پايدالانىپ، ولاردىڭ زەينەتاقىسى مەن الەۋمەتتىك تولەمدەرىن الۋدى جالعاستىرعان.

پروكۋراتۋرانىڭ دەرەگىنشە، مارقۇمداردىڭ ەسەپشوتتارى ارقىلى مەملەكەتكە 600 مىڭ تەڭگەدەن استام شىعىن كەلگەن. ال مال ساتۋدان كەلگەن زالال 1 ميلليون 450 مىڭ تەڭگەنى قۇراعان.

قىلمىستىڭ سەبەپتەرى

پروكۋرور ميراس باۋىرجانوۆتىڭ ايتۋىنشا، ناۋرىز مۇقانعالييەۆ، ءناسىپ وتەشقالييەۆا، ماقسوت قارابالين جانە مەيرامگۇل قارابالينا ولتىرىلگەننەن كەيىن ايىپتالۋشى قىلمىستىڭ ۇزاق ۋاقىت اشىلمايتىنىن ويلاعان. سونداي-اق، ول كەيىن ءوزى بوي تاسالاۋدى جوسپارلاعان دەگەن نۇسقا دا ايتىلدى.