InfoHub Logo

ەلىمىزدەگى نوتاريۋستار سوڭعى ءۇش جىلدا 280 مىڭنان استام جالعان اتقارۋشىلىق جازبانى زاڭسىز شىعارىپ، قازاقستاندىقتاردىڭ موينىنا جوق قارىزدى ىلگەن. بۇل ارەكەتتەر ارقىلى ولار كوللەكتورلىق جانە ميكروقارجى ۇيىمدارىنا 400 ميلليون تەڭگەگە جۋىق قاراجاتتى زاڭسىز يەلەنۋگە جول بەرگەن. وسى زاڭسىزدىققا توسقاۋىل قويۋ ماقساتىندا دەپۋتاتتار نوتاريات قىزمەتى ماسەلەلەرى بويىنشا زاڭ جوباسىن ءبىرىنشى وقىلىمدا ماقۇلدادى.

بۇل تۋرالى Infohub.kz اقپارات اگەنتتىگى حابارلايدى.

نوتاريۋستاردىڭ زاڭسىز ارەكەتتەرى

ءماجىلىستىڭ پلەنارلىق وتىرىسىندا دەپۋتات باقىتجان بازاربەك 2023 جىلعى پروكۋرورلىق شارا تۋرالى اكتىنى جاريا ەتتى. وندا ەلىمىز بويىنشا ونداعان نوتاريۋستىڭ جالعان قارىزدار، جالاقىلار جانە مەملەكەتتىك ساتىپ الۋلار بويىنشا اتقارۋشىلىق جازبالاردى زاڭسىز شىعارىپ كەلگەنى ايتىلعان.

«كوپتەگەن نوتاريۋستار قارىز الۋشىلاردان جازباشا مويىنداۋدى نەمەسە مىندەتتەمەلەردى ورىنداماعانى تۋرالى ءتيىستى دالەلدەردى تالاپ ەتپەي، زاڭنان اتتاپ كەتتى. كەيبىر نوتاريۋستار ميكروقارجى ۇيىمدارى، لومباردتار مەن كوللەكتورلاردىڭ پايداسىنا زاڭسىز تۇردە وسىنداي جازبالاردى شىعارىپ، ادامدارعا جالعان قارىز نەمەسە مىندەتتەمەلەردى جۇكتەگەن. ودان كەيىن جەكە سوت ورىنداۋشىلارى بۇل سومالاردى جاپپاي ءوندىرىپ الىپ، ازاماتتاردى قورقىتتى»، — دەدى بازاربەك جانە وسىنداي زاڭگەرلەردىڭ ەسىمدەرىن اتاپ ءوتتى.

ونىڭ ايتۋىنشا، ەلدە تالاپتارعا ساي كەلمەيتىن 280 مىڭ جازبا انىقتالعان. ءاربىر «سولقىلداق» جازبا ءۇشىن نوتاريۋس مقۇ جانە كوللەكتورلاردان ورتا ەسەپپەن 5 مىڭ تەڭگە العان. تابىستىڭ جارتىسىن ولار كەيىننەن تاپسىرىس بەرۋشىلەرگە سىياقى رەتىندە قايتارعان — ءۇشىنشى تۇلعالار ارقىلى مقۇ قىزمەتكەرلەرىنە اۋدارعان نەمەسە قولما-قول بەرگەن.

زاڭداستىرىلعان رەكەتكە توسقاۋىل

«ءۇش جىل ىشىندە بۇل نوتاريۋستار مقۇ جانە كوللەكتورلىق ۇيىمداردىڭ قىزمەتكەرلەرىنە 400 ميلليون تەڭگە اۋدارعان. بۇل ەندى نوتاريات ەمەس، زاڭداستىرىلعان رەكەت! بۇعان قوسا، پروكۋرورلىق شارا ءالى ورىندالعان جوق. تۇلعالار جاۋاپقا تارتىلمادى! قاماۋلار قايدا؟ قىلمىستىق ىستەر قايدا؟ بۇل سۇراققا ەشكىم جاۋاپ بەرە المايدى!» — دەپ اشۋلاندى بازاربەك.

ول ۇسىنىلىپ وتىرعان تۇزەتۋلەر نوتاريۋستاردىڭ جاۋاپكەرشىلىگىن قاتاڭ كۇشەيتۋى كەرەكتىگىن اتاپ ءوتتى. مىسالى، جەكە دەرەكتەر تۋرالى تالاپتاردى بۇزعانى ءۇشىن جازا ەنگىزىلەدى، ازاماتتاردىڭ ەسق-سىن ءۇشىنشى تۇلعالارعا بەرۋگە تىيىم سالىنادى، سونداي-اق نوتاريۋستىڭ مامىلەگە قاتىسۋشىلارمەن بايلانىسى بولعان جاعدايدا قاتاڭ شەكتەۋلەر قويىلادى.

ءوز كەزەگىندە، ماجىلىسمەن نۇرسۇلتان بايتىلەسوۆ زاڭ جوباسىن ۇسىنىپ، ەندى اتقارۋشىلىق جازبا قارىز الۋشىنىڭ تىركەلگەن جەرى بويىنشا عانا جاسالاتىنىن حابارلادى. تۇرعىلىقتى ايماق سايكەس كەلمەسە، اۆتوماتتى تۇردە بۇعاتتاۋ تەتىگى ىسكە قوسىلادى. بۇعان قوسا، نوتاريۋستار اتقارۋشىلىق جازبانىڭ كوشىرمەسىن مىندەتتى تۇردە ەلەكتروندىق ۇكىمەت پورتالى جانە SMS ارقىلى جەتكىزىلگەنىن تىركەپ، قارىز الۋشىعا جىبەرۋگە مىندەتتەلەدى.

«زاڭ جوباسىمەن نوتاريۋستاردىڭ جەكە سوت ورىنداۋشىلارىمەن، ميكروقارجى ۇيىمدارىمەن جانە باسقا دا قاتىسى بار تۇلعالارمەن بايلانىسىن بولدىرماۋ ءۇشىن قوسىمشا شەكتەۋلەر بەلگىلەۋ ۇسىنىلادى. اتاپ ايتقاندا، جاقىن تۋىستىق نەمەسە وزگە دە تاۋەلدىلىك بولعان جاعدايدا نوتارياتتىق ارەكەتتەر جاساۋعا تىيىم سالىنادى. مەملەكەتتىك جانە كۆازيمەملەكەتتىك سەكتور شارتتارى بويىنشا اتقارۋشىلىق جازبالاردى نوتاريۋستاردىڭ قۇزىرەتىنەن مۇلدەم الىپ تاستاۋ ۇسىنىلادى. بۇل ماسەلەلەر سوتتىڭ قاراۋىنا بەرىلەدى»، — دەدى بايتىلەسوۆ.