InfoHub Logo

قازاقستاندىقتار ءۇشىن ماڭىزدى جاڭالىق! ەگەر ءسىز زەينەتاقى جيناقتارىڭىزدان اقشا الۋدى جوسپارلاپ جۇرسەڭىز، اسىعىڭىز. ويتكەنى، 5 ماۋسىمنان باستاپ بۇل قاراجاتتى الۋدىڭ ەڭ تومەنگى شەكتى مولشەرى وزگەرەدى.

"وتباسى بانك" ءوز كليەنتتەرىنە وسى جاڭالىقتى ەسكەرتىپ، قولدانىستاعى ەرەجەلەر بويىنشا ءوتىنىش بەرۋدى بۇگىن، ياعني 4 ماۋسىمعا دەيىن اياقتاۋعا كەڭەس بەردى.

بۇل تۋرالى Infohub.kz اقپارات اگەنتتىگى حابارلايدى.

زەينەتاقى جيناقتارىن الۋدىڭ جاڭا ەرەجەلەرى

زەينەتاقى جيناقتارىن پايدالانۋدىڭ ەڭ تومەنگى شەكتى مولشەرى دەگەنىمىز – سالىمشىنىڭ زەينەتاقى شوتىندا قالۋعا ءتيىس سوما. بۇل شەكتەن اسقان قاراجاتتى تۇرعىن ءۇي ساتىپ الۋعا، يپوتەكانى وتەۋگە نەمەسە باسقا دا ماقۇلدانعان ماقساتتارعا جۇمساۋعا بولادى.

جاقىندا عانا پرەمەر-مينيستر ولجاس بەكتەنوۆ زەينەتاقى جيناقتارىنىڭ ەڭ تومەنگى جەتكىلىكتىلىك شەگىن ەسەپتەۋدىڭ جاڭا ادىستەمەسىن بەكىتكەن بولاتىن. جاڭا ەرەجەلەر بويىنشا، ەسەپتەۋ كەزىندە زەينەتاقى جيناقتارىنىڭ جىلدىق كىرىستىلىگى 9% جانە جىلدىق زەينەتاقى تولەمدەرىن يندەكستەۋ 8% دەڭگەيىندە ەسەپكە الىنادى.

سونىمەن قاتار، جاڭا ادىستەمە بويىنشا ەسەپتەلگەن ەڭ تومەنگى شەكتى مولشەر، ءتيىستى جاسقا ارنالعان وتكەن جىلعى كورسەتكىشتەن كەم بولماۋى ءتيىس. ول بولجامدى ينفلياسيادان بەس پايىزدىق پۋنكتكە جوعارى يندەكستەلەدى.

جاڭا ادىستەمە 5 ماۋسىمنان باستاپ كۇشىنە ەنەدى. وسىدان كەيىن ءبىرىڭعاي جيناقتاۋشى زەينەتاقى قورى (بجزق) ءۇش جۇمىس كۇنى ىشىندە 2026 جىلعا ارنالعان ەڭ تومەنگى جەتكىلىكتىلىك شەگىن باق-تا جانە ءوز سايتىندا جاريالاۋعا مىندەتتى بولادى.