InfoHub Logo

1 naýryz alǵys aıtý kúnine arnalǵan
Taqyryby: Rızashylyq

Maqsaty: balalardyń «syılastyq» qundylyǵy týraly túsinikterin keńeıtý
Mindetteri: - rızashylyq pen alǵys týraly túsinik berý;
- úlken - kishige degen súıispenshiligin, sypaıylyq qarym - qatynasyn damytý;
- ádeptilikke, kishipeıildilikke, izettilikke tárbıeleý.
Kórnekilikteri: oqýlyq, dápter, sandyqsha

Shattyq sheńberi
Rızamyn men búginge,
Rızamyn men búginge,
Rızamyn men búginge,
Rızamyn men qazirge!
Rızamyn, rızamyn, rızamyn búginge,
Rızamyn, rızamyn, rızamyn qazirge.
Balalar tizbektelip, bir - birlerine tilek bildirip shyǵady.

Áńgimelesý
- Balalar, sender kimderdi jaqsy kóresińder?
- Olardy nelikten jaqsy kóresińder?
- Al ózderińdi kimder jaqsy kóredi? Qalaı jaqsy kóredi?
Rızashylyq degenimiz ne?
Alǵys degendi qalaı túsinesińder?
- Adam óziniń rızashylyǵyn, alǵysyn qandaı sózdermen bildiredi?
- Senderge kim qandaı jaǵdaıda alǵys aıtty?
- Ózderiń qandaı jaǵdaıda alǵys aıtyp kórdińder?
Balalardyń jaýaptary tyńdalady.
Sonymen, raqmetke laıyqty kimder? Tizimdi birge quraıyq! Bastysy alǵys aıta bilý...
Anaǵa – ómir syılaǵany úshin,
Ákege – qorǵan bolǵany úshin,
Dalaǵa – gúlderi men kók shalǵyny úshin,
Sózge – jandy jylytatyny úshin,
Kúnge – shýaǵy men nazary úshin,
Juldyzǵa – qarańǵy túndegi jaryǵy úshin,
Dosqa – qushaǵy men ıyǵy úshin,
Ájege – ystyq alaqany úshin,
Sýǵa – tirshilik kózi bolǵany úshin,
Jerge – mahabbaty men bar bolǵany úshin,
Otqa – jylýlyǵy úshin...
Rızashylyq - adamnyń basqa adamnan kórgen jaqsylyǵy, kómegi, kóńili úshin qanaǵattanýshylyq jáne alǵys bildirýshilik sezimi.

Alǵys – adamnyń adamǵa jasaǵan jaqsylyǵy, kómegi, kóńili úshin rızashylyq bildirýi, sondaı - aq onyń oıy men is - áreketine, jasaǵan isterine joǵary baǵa berýi.

Áńgimeleý
"Alǵys" M. Tórejanov
Pedagog balalarǵa ózin jaqsy kóretin jaqyn adamdardyń qanshalyqty qymbat ekenderin sezintip, qadirin uǵyndyra túsý maqsatynda balalarǵa tómendegideı mátinderdi qosymsha oqyp beredi.
"Maquljan" T. Jarqynbekova
- Tóleýdi qandaı bala dep aıta alamyz?

Dáıeksóz
"Adam óz isine qanaǵattanyp, súısingen kezde rızashylyq sezimge bólenedi.
Ózine jasalǵan jaqsylyqqa rızashylyq bildirýdi alǵys deımiz"
Pedagog balalarǵa "Alǵyspen el kógerer" degen halyq maqalyn búgingi oqý is - árekettiń dáıeksózi retinde túsindiredi. Úlkenderdiń aıtqan tilin alý, syılastyqqa ákeledi. Senderdiń kórsetken kómekterińe úlken kisiler alǵys aıtady, rızashylyǵyn bildiredi."Alǵyspenen el kógerer"degen sóz osydan shyqqan.

Sergitý sáti
Oıyn:"Symsyz telefon"

Tynyshtyq sáti
- Balalar, denelerińdi túzý ustap, bastaryńdy joǵary kóterip, yńǵaılanyp otyryńdar. Kózderińdi jumsańdar da bolady. Aýany tereń jutyp, erkin tynys alyńdar. Ózderińniń tynys alýlaryńdy baqylap, baqytqa, mahabbat pen tynyshtyqqa toly taza, shıpaly aýanyń tula boılaryńa tolǵanyn sezinińder. Al endi, kózderińdi ashsańdar da bolady.
Ǵajaıyp sózder
Jaqsylyq jasaý. Alǵys aıtý. Rızashylyq bildirý. Raqmet.

Qorytyndylaý
- Balalar, jyly sóz, qaıyrymdy is, jaqsy oı, kirshiksiz sezimderińdi eshkimnen eshqashan aıamańyzdar. «Rahmet» degen qasıetti sózdi jıi aıtyńdar. Adam alǵys pen rızashylyqty estigen saıyn, jaqsylyq jasaǵysy kelip turatynyn este saqtańdar. Ómirdiń árbir sátin baǵalaı bilýge úırenińder jáne Tabıǵat – Anaǵa meıirimdi kúni úshin, kóńildi jańbyry men aq qary úshin, jumsaq aq ulpa bulty úshin, jaqyn adamdarǵa qaıyrymdylyǵy men rıasyz mahabbaty úshin alǵys aıtýdy umytpańdar.
Búgingi oqý is - áreketi senderge unady ma?

Mańǵystaý oblysy, Qaraqıa aýdany, Munaıshy aýyly
"Balaýsa"balabaqshasynyń tárbıeshisi Kapýova Gýlshat