InfoHub Logo

2023 jyldan bastap 1 synyp tabaldyryǵyn attaǵan balalar latyn grafıkasyna negizdelgen qazaq álipbıimen bilim ala bastaıdy. Bul týraly QR Mádenıet jáne sport mınıstrligi Til saıasaty komıtetiniń tóraǵasy Ádilbek Qaba aıtty.

«Ózderińizge belgili, jaqynda Úkimet janyndaǵy Ulttyq komısıada jetildirilgen latyn grafıkaly qazaq álipbıi qaralyp, maquldanǵan bolatyn. Ǵalymdarymyz bul baǵytta 1,5 jyldan astam ýaqyt boıy jumys istedi. Álipbı búkil respýblıka boıynsha ashyq talqylanyp, synamalar, beıimdeý júrgizildi. Sóıtip, álipbıimizdiń jazylýy, oqylýy, qoldanysy jan-jaqty zerdelendi. Bul álipbı aldaǵy ýaqytta Prezıdent qaraýyna usynylady. Bekitilgen jaǵdaıda aldaǵy ýaqytta kestege sáıkes kezeń-kezeńimen latyn álipbıine kóshý jumystary júrgiziledi», - dedi komıtet tóraǵasy «Memlekettik til – halyqty uıystyrý quraly» taqyrybyndaǵy otyrys barysynda.

Onyń atap ótýinshe, bıyl latyn grafıkasyna negizdelgen qazaq álibıin jetik biletin muǵalimder daıarlanyp, orfografıalyq, orfoepıalyq sózdikter, anyqtamalar ázirlenedi.

«Iaǵnı, 2021 jyl latyn grafıkasyna negizdelgen qazaq álibıin oqytýǵa daıyndyq jyly bolyp eseptelinedi. 2022 jyly balabaqshada tálim-tárbıe alyp jatqan balalar oqı bastaıdy. Al 2023 jyldan bastap 1 synyp tabaldyryǵyn attaǵan balalar latyn grafıkasyna negizdelgen qazaq álipbıin oqıdy. Demek, 2031 jyly latyn grafıkasyna negizdelgen qazaq álipbıinde bilim alǵan alǵashqy túlekterimiz mektep bitirip, úlken ómirge aıaq basady», - dedi Ádilbek Qaba.

Aıta keteıik, atalǵan otyrystyń maqsaty – Qazaqstan Respýblıkasy Úkimetiniń janyndaǵy Ulttyq komısıa maquldaǵan jetildirilgen latyn grafıkasyndaǵy qazaq álipbıi men emle erejelerin qoǵamda keńinen nasıhattaý jáne jahandaný kezeńindegi qazaq tilin damytý máselelerin talqylaý.

---