InfoHub Logo

Búgin, 18 qańtarda ótken Jastar máseleleri týrasyndaǵy jınalysta Oljas Sultanov Atyraý oblysynyń ákimi Nurlan Noǵaevqa jobasyn kórsetti.

"Atyraý qalasyna jastarǵa arnalǵan zamanaýı saıabaq kerek dep oılaımyn. Sol sebepti "banan baǵy" jobamdy usynamyn. Qalanyń Eýropa bóliginde Dosmuhamedov ýnıversıtetiniń artynda pishini bananǵa uqsaıtyn jer aýmaǵy bos jatyr. Jaıyqtyń jaǵasynda ornalasqan sol jerge jastarǵa arnalǵan zamanaýı baq turǵyzýdy usynamyn", - dedi Oljas Sultanov.

Joba avtorynyń aıtýynsha, baq ishinde muz aıdyny, atraksıondar, sport kesheni, balalarǵa arnalǵan oıyn alańy, amfıteatr, velosıpedshilerge, skeıtbordshylarǵa arnalǵan sport alańqaıy, Jaıyq boıymen serýen qurýǵa múmkindik beretin qaıyqtar men katamarandar bolady.

"Bul ıdeıa maǵan qalany damytý týraly bolǵan pikir almasýlardyń birinde keldi. Jastarǵa mundaı baq aýadaı qajet dep oılaımyn. Bul olardyń ýaqytyn tıimdi ótkizip, oǵash ádetterden aýlaq bolýyna sebep bolady", - deıdi jas zańger.

Atyraý oblysynyń ákimi Nurlan Noǵaev Atyraý qalasy ákiminiń orynbasary Meıirim Qalaýıǵa jobany muqıat zerttep, usynys engizýdi tapsyrdy. Aımaq basshysy, sonymen qatar, jastardyń ýaqytyn tıimdi paıdalanyp, óz-ózderin damytýy úshin bar jaǵdaıdyń jasalyp jatqanyn tilge tıek etti.

"Jastardyń ýaqytynyń tıimdi, ári sapaly ótýi úshin bıyl "Jasyl el" aksıasy boıynsha ashylatyn jumys oryndarynyń sanyn jergilikti búdjet esebinen keminde 3 esege deıin arttyrýymyz kerek. Bul jastardyń jazǵy demalys ýaqytynda bos júrmeı, aqsha taýyp, tájirıbe jınaýyna úlken kómek bolady. Demalys oryndarynyń kóp bolýy olardyń mádenıeti joǵary, bilimdi maman bolyp ósip shyǵýyna septigin tıgizedi", - dedi Nurlan Noǵaev.

Aıta keteıik, Atyraý qalasynda 10 saıabaq jumys istep tur. Olardyń jalpy aýdany - 20 gektar. Bulardyń qataryna jaqyn aralyqta jalpy aýdany 21 gektar bolatyn 3 saıabaq qosylmaq.

---