InfoHub Logo

Búgin jastardy jumyspen qamtý máselelerine arnalǵan jınalys barysynda Atyraý oblysynyń ákimi Nurlan Noǵaev bilim granttaryn bólý tártibin júıelendirýdi jáne «Jasyl El» stýdentter jasaǵynyń sanyn arttyrýdy tapsyrdy.

«2017 jyly «Jasyl El» eńbek ujymynyń sany artady. Eger byltyrǵy jyly ár aýdanda 50 adamnan bolsa, bıyl olardyń sany 60-tan 75-ke deıin artady. Odan bólek, jumysshylardyń eńbek aqysy kóbeıetin bolady. 2015-2016 jyldary jalaqy 47 729 teńge bolsa, 2017 jyly 59 000 teńgeni quraıdy», - dep málimdedi Jastar saıasaty máselesi boıynsha basqarma basshysy Jaslan Bısembaev.

Oblys ákimi Nurlan Noǵaevtyń jınalysyna qatysýshylardyń biri qoıǵan «Jasyl El» qyzmetindegi stýdentter sanyn nege arttyrmasqa degen suraqqa, Bısembaev baǵdarlamaǵa respýblıkalyq búdjetten demeýshilik tanytylýda dep jaýap berdi.

«Bul máseleni sheshemiz, usynysty daıyndańyzdar, jergilikti búdjet stýdentterge arnalǵan qosymsha jumys oryndaryn qurý úshin qarjy bóledi. Oblystaǵy mektepterdiń joǵary synyptarynda 26 myń bala, JOO-da  10 myń stýdent pen kolejderde 18 myń bilim alýshy bar. Biz olardyń kóp bóligin qamtamasyz etýimiz kerek, jaz aılarynda jumys taýyp berýimiz qajet. Biz memlekettik baǵdarlama boıynsha kóptegen nysandar salyp jatyrmyz, nelikten aqsha tapqysy keletin stýdentterdi qurylysqa jumyldyrmasqa?», - dedi ákim.

Nurlan Noǵaev bilim granttaryn bólýge qatysty bilim basqarmasynyń basshylyǵyna syn aıtty.

«Nege qazaq tilinde bastaýysh synyptarǵa bilim beretin mamandyqty ıgerip shyqqan mamandar jumyssyz otyr? Sebebi, memlekettiń bilim grantyn ıelenip, mamandyqty ıgerip shyqqannan soń olar shynaıy ómirmen kezdesti. Bizdiń oblys orys tilinde bastaýysh synyptarǵa bilim beretin mamandarǵa tapshy bolyp otyrǵanda, keıbir aýdandarda qazaq tilinde bastaýysh synyptarǵa bilim beretin muǵalimniń ornyna 30 adamǵa deıin úmittenýde. Pán muǵalimderi jetispeıdi. Bilim granttaryn naqty bólip, úgit-nasıhat jumystaryn óz ómirin pedagogıkaǵa arnaǵysy kelgen adamdardyń arasynda júrgizý qajet. Bizdiń qolymyzda qajetti mamandyqtardy zertteýge arnalǵan barlyq múmkindik bar: bilim granttary, jas mamandarǵa arnalǵan baǵdarlamalar, osy arqyly muǵalimderdiń jetispeýshilik máselesin birjola sheshý qajet. Saraptama jasap, qajetti mamandyqtarǵa grant bólýge qol jetkizińizder», - dep tapsyrdy N.Noǵaev. 

---