InfoHub Logo

Abaı oblysynda qazba jumystary kezinde qola dáýiriniń dala pıramıdasy tabyldy.

L.N. Gýmılev atyndaǵy Eýrazıa ulttyq ýnıversıtetiniń (EUÝ) arheolog-ǵalymdary Eýrazıa dalasynda kezdespeıtin qola dáýiriniń iri kólemdegi dala pıramıdasyn tapty. Qazba jumystary Abaı oblysynda júrgizilýde. 2014 jyldan bastap EUÝ tarıh fakúlteti arheologıa jáne etnologıa kafedrasynyń ǵalymdary Abaı oblysy, Abaı aýdany Toqtamys eldi mekeniniń janyndaǵy Qyryqúńgir keshendi eskertkishinde arheologıalyq qazba jumystaryn júrgizip keledi. Oǵan ýnıversıtet stýdentteri men magıstranttary atsalysady. Júrgizilgen zertteý jumystarynyń nátıjesinde Eýrazıa dalasynda kezdespeıtin bizdiń dáýirimizge deıingi ekinshi myńjyldyqtyń basy, ıaǵnı osydan tórt myń jyl burynǵy qola dáýiriniń iri kólemdegi dala pıramıdasy tabyldy - delingen mınıstrlik aqparatynda.

Tarıhshy ǵalym, EUÝ arheologıa jáne etnologıa kafedrasynyń meńgerýshisi Ulan Úmitqalıevtiń aıtýynsha, tabylǵan pıramıdanyń qabyrǵalarynda janýarlar beınelengen.

"Dala pıramıdasy óte dáldikpen salynǵan, alty qyrly. Árbir qyrynyń arasy on úsh metr jáne segiz qatar taspen qalanǵan. Ortasynda birneshe sheńberi bar. Bul – óte kúrdeli keshendi qurylys. Sol keshendegi qurylystyń syrtyndaǵy qabyrǵalarynda ártúrli janýarlardyń, ásirese jylqynyń sýretteri basym beınelengen. Sonymen birge túıeniń de beıneleri bar. Qazbadan tabylǵan málimetter, qysh ydystar, áıel adamnyń altyn syrǵasy jáne taǵy basqa áshekeı buıymdar osy qola dáýiriniń úlken kóne dáýirde mádenıeti, oshaǵy bolǵandyǵyn kórsetedi. Bul, ıaǵnı, sol kezeńniń ózinde jylqy kúltiniń óte joǵary bolǵandyǵyn sol tas qurylystyń aınalasynda jylqy súıekteriniń tabylýy dáleldep otyr" - deıdi Ulan Úmitqalıev.

Málim etilgendeı, qazirgi ýaqytta zertteýler sheteldik ǵalymdarmen birlesip júrgizilip jatyr.

---