InfoHub Logo

Taqyryby: Ájemizde qonaqta
Komýnıkasıa.
Oqý qyzmeti: Saýat ashý
Maqsaty: Ótilgen dybystar men áripterdi qaıtalaý, [r] dybysy men áribin bekitý. Sózdik qorlaryn molaıtý. Qyzyqty tapsyrmalar men oıyndar arqyly balalardyń zeıinin oıatý, oqý qyzmetine qyzyǵýshylyǵyn arttyrý. Qarym - qatynas mádenıettiligine tárbıeleý.
Sózdik jumys: robot
Úshtildilik komponent: áje - babýshka
Qajetti qural jabdyqtar men kórnekilikter: zattyq sýretter, kók jáne qyzyl tústi gúlderi bar kilemshe, dybystyq taldaýǵa arnalǵan oıyntastar, jip, ótilgen áripter jazylǵan kók jáne qyzyl tústi kartonnan daıyndalǵan monshaqtar, robot sýreti, qaryndashtar.

Jylýlyq sheńberi.
Ótkendi qaıtalaý
Balalar búgin biz ájeniń úıine qonaqqa baramyz. Ájemizdiń úıi aýylda ǵoı, oǵan qalaı tez jetsek bolady? (balalar óz oılaryn aıtady)
«Sıqyrly soqpaq» dıdaktıkalyq oıyny.
- Balalar, men taptym ájemizdiń úıine myna sıqyrly soqpaqpen baraıyq. Sıqyrly soqpaqtyń bir ereksheligi, egerde myna sıqyrly soqpaqtaǵy áripterdi durys atap ótseńder, ájemizdiń úıine tap bolasyńdar.
Balalar A, Ý, L, O, Á, T, N, E, Ó áripterin atap ótedi.
- Jaraısyńdar balalar, mine ájemizdiń úıine de kelip qaldyq.

Psıhologıalyq jattyǵý.
- Ájemizdiń úıinde súp - súıkimdi mysyǵy bar. Kórsetińdershi, ol qalaı mıaýlaıdy?(máý - ý - ý) Taǵy da ájeniń úıin úlken ıt kúzetip otyr. Ol bóten adamdarǵa ashýlanǵanda ne isteıdi?(r - r - r)
- It qandaı dybys shyǵarady?
-[r] dybysyn aıtqanda tilimiz qandaı qalypta bolady?
-[r] dybysy daýysty dybys pa, álde daýyssyz ba?
-[r] dybysyn qandaı túspen belgileımiz?
- Balalar, senderdiń aqyldy ekenderińdi baıqaǵan ıttiń ashýy basylǵan sıaqty. Endeshe ájemizdiń úıine kireıik.

«Oılan, tap» dıdaktıkalyq oıyny.
- Oı, ájemizdiń úıi qandaı ádemi! Balalar ájemizdiń úıinde quramynda [r] dybysy bar zattardyń ataýyn atap berińdershi.
- qorjyn, urshyq, kórpeshe, oramal, dombyra, torsyq...
- Al endi osy sózderdi býynǵa bólip aıtyńdarshy.
- Balalar ájemiz kórinbeıdi ǵoı. Úı sharýasymen as úıde júrgen sıaqty. Sezesińder me, dámdi ıis shyǵyp jatyr.

Tynys alý jattyǵýy «Maısók»
- Ájemiz bizge maısók ázirlep jatyr eken. Ájemiz kelgenshe, onyń bizge daıyndaǵan oıyn tapsyrmalaryn oryndaıyq.

Sózdik jumys.
- Ájemizdiń úıinde úı sharýasyna kómektesetin robot bar eken. Robot - adam júrisi men qımylyn eliktiretin avtomattandyrylǵan qurylǵy. Ol adamnyń qyzmetteri men is - áreketterin tolyq atqarady. Robot - cheh jazýshysy oılap shyǵarǵan sóz «jumysqa sheber adam» degen maǵynany beredi.

1 - tapsyrma: Robot sózin dybystarmen jazyp kórseteıik.
Bir bala taqtada, al qalǵandary oryndarynda otyryp, dybystyq taldaý jasaıdy.
- Ájemiz bizge arnap kilem toqyp qoıypty. Óte ádemi eken. Kelińder kilemshemen oıyn oınaıyq.


Sergitý sáti: «Zeıindi bol» oıyny
Oıyn sharty: balalar kilemsheni aınalyp bılep júredi, áýen toqtaǵanda, daýysty dybys estilse kilemshedegi qyzyl gúldi, daýyssyz dybys estilse kók gúldi basyp turady.

2 - tapsyrma: «Dybystyń ornyn tap» dıdaktıkalyq oıyny.
- myna sýrettegi sóz quramyndaǵy [r] dybysynyń ornyn anyqtap, R áribin jazamyz.
Nıtkografıa.
- R áribin jippen jazyp kórsetińdershi.
Balalar «Ara, sıyr, radıo» sózderindegi [r] dybysynyń ornyn anyqtaıdy, sózdiń neshe dybystan quralǵanyn, [r] dybysynyń sózdiń qaı jerinde estiletinin aıtady.
- Balalar osy sózderdi qatystyryp sóılem qurap berińdershi.

3 - tapsyrma: «Áripter syılaımyz» oıyny.
- Ájemiz bizge arnap R áribin daıyndapty, kim quramynda [r] dybysy bar sózder aıtsa, sol balaǵa áripter syılaıdy.
Balalar quramynda [r] dybysy bar sózder aıtady.
- Balalar, ájeniń monshaqtary úzilip qalypty. Ájemizge monshaqtardy ádemilep jasap bereıik

4 - tapsyrma: «Ǵajaıyp monshaq» dıdaktıkalyq oıyny.
Oıyn sharty: áripter jazylǵan monshaqtardan qysqa sóz jazyp, monshaqtardy jipten ótkizedi, ár bala óz sózin oqıdy.
- Mine, ájemizdiń ózi de kelip qaldy. Endeshe ájemizge monshaqtarymyzdy syılaıyq.
Áje:- Rahmet balalar! Meniń tapsyrmalarymdy óte jaqsy oryndadyńdar. Men senderge arnap maısók ázirlep qoıdym.
- Balalar, endeshe «Sıqyrly soqpaq» arqyly tobymyzǵa qaıtaıyq.

Balalardy madaqtap qandaı áser alǵandaryn suraý.
Kútiletin nátıje:
Biledi: [r] dybysynyń daýyssyz dybys ekenin; quramynda [r] dybysy bar sózderdi ataýdy.
Igeredi:[r] dybysynyń sózdegi ornyn, sózderdi býynǵa bólýdi, sóılem quraýdy;
Meńgeredi: ótilgen áripterden qysqa sózder quraýdy, monshaqtardy jipke retimen tizbekteýdi;

Jambyl oblysy, Baızaq aýdany
Sarykemer aýyly, Baldyrǵan balabaqshasynyń tárbıeshisi
Alıbekova Ulmeken