InfoHub Logo

Kúnderdiń bir kúninde aýyldan qalaǵa kele qalǵan bir qazaq meshit mańynda turǵan bir top moldaǵa tap bolypty. Ol meshit- ke kirip-shyǵyp jatqan kisilerdi kórip:

— Bul ne jıyn? — dep, surapty moldalardan.

— Bul qudaıǵa jalbarynyp, muń-muqtajdaryn aıtyp jatqan jarlylardyń jıyny, — deıdi moldanyń biri.

— Qudekege men de jalbarynyp, muń-muqtajymdy bildirsem qaıtedi?

— O, ne degenińiz, baryńyz!

Qazaq atyn baılaı salyp, meshitke kirip keledi. Baqsa meshittiń tórinde ústine aq jamylǵan daǵaradaı sáldesi mıyǵyna túsken, qolyna asasyn ustaǵan bireý otyr. Onan basqa jan joq.

— Bul qalaı? Qudaıy qaıda? Aryzymdy kimge aıtamyn? — dep ishinen kúbirlepti jolaýshy.

— Qudaıyń men, ne aıtasyń? — depti, meshit tórinde moldas quryp otyrǵan molda.

— Taqsyr, Qudaı! Meniń ushqan qusty ornynan basatyn qumaı tazym bolýshy edi. Ótken jyly oqys jerden sony aldyńyz, ne
jazdym sizge?

— Kerek boldy! — dep zekirdi sáldeli «Qudaı».

— Osy jazda taqymǵa tartar jalǵyz dónenimdi aldyńyz. Taǵy ne jazdym?

— Ol da kerek boldy.

— Ótken aıda kózimniń qarashyǵyndaı jalǵyz balamdy jalmadyńyz. Sonshalyq zarlatar ne kúnám bar?

— Ózim berdim, ózim aldym. Onda isiń bolmasyn.

— Aý, bárin de kerek deısiń, sonda saǵan kerek bala maǵan kerek emes pe? — dep, belindegi doıyr qamshysyn sýyryp alyp, moldany kók ala qoıdaı etip sabapty. Qudaı bolyp jurttyń tapqan-taıanǵanyn aldap alyp júrgen molda sóıtip sazaıyn tartypty. «Aldaý túbi — azap» degen osy da.

---