InfoHub Logo

Shymkentte halyqaralyq bilim kórmesi ótýde. «International Education Fair 2018» atty kórmede sheteldiń eń maqtaýly ýnıversıtetteriniń ókilderi jastardy stıpendıalyq baǵdarlama boıynsha tegin oqýdyń tıimdi tetikterimen tanystyrdy.

«Halyqaralyq baǵdarlamalar ortalyǵy» AQ men  Qazaqstan Respýblıkasy bilim jáne ǵylym mınstrliginiń qoldaýymen uıymdastyrylǵan kórmege AQSH, Ulybrıtanıa, Eýropa men Azıa jáne TMD elderiniń 83 joǵary oqý oryndary, til úıretý mektepteri men bilim agenttikteri qatysty. Olar shara barysynda shet tilderinde erkin sóıleıtin, qabiletti jastardy oqýǵa shaqyrdy. Atalǵan jıynǵa arnaıy qatysqan oblys ákimi Janseıit Túımebaev    qonaqtarǵa óńirdiń bilim salasyndaǵy múmkindikteri men áleýetin tanystyryp ótti.

«Elbasymyz árdaıym óziniń halyqqa arnaǵan Joldaýlarynda jastardyń bilimdi de, básekege qabiletti bolý kerektigin únemi aıtyp keledi. Mine, osy maqsatta «Bolashaq» halyqaralyq stıpendıasy quryldy. Atalǵan baǵdarlama aıasynda álemniń 35-ten astam elinde 12 myńnan astam qazaqstandyq azamat bilim aldy. Búginde baǵdarlama boıynsha bilim alǵan 300-den astam ońtústikqazaqstandyq jas elimizdiń ekonomıkalyq damýyna óz úlesterin qosýda. Halyq sany jaǵynan kósh basynda turǵan óńirimiz, «Bolashaq» baǵdarlamasyna qatysý boıynsha da birinshi orynda bolý kerek dep oılaımyn. Al, biliktilikti arttyryp, bilimdi jetildire túsýge kelgende mundaı tájirıbe almasý kórmesiniń róli orasan dep bilemin», - dedi Janseıit Qanseıituly.

Kórmege birinshi kúnniń ózinde shetelde oqýdy armandaıtyn 4 myńnan astam jas keldi. Shara barysynda qazaqstandyq jáne sheteldik joǵary oqý oryndarymen bilim agenttikteri arasynda kezdesý uıymdastyryldy. Onda «Bolashaq» baǵdarlamasyn paıdalaný aýqymyn keńeıtý jaıy sóz boldy. Mamandar pikirinshe shetelderde bilim alatyn qazaqstandyq stýdentterdiń sany jospardaǵydan aıtarlyqtaı az.

«Búginde shetelge baryp bilim alýǵa nıetti azamattardyń sany óte az. Sebebi, halyq «Bolashaq» baǵdarlamasy týraly aqparatpen qanyqpaǵan dep oılaımyn. Osy máseleni sheshý maqsatynda álemniń damyǵan elderinen jáne otandyq joǵary oqý orynnyń ókilderin shaqyryp, osyndaı bilim kórmesin uıymdastyryp otyrmyz. Maqsatymyz - ózge elge baryp bilim alatyndardyń qataryn kóbeıtý. Qazirgi tańda ózge elderde oqıtyn jastardyń 85 paıyzy Astana, Almaty qalalaryna tıesili. Endi ońtústikqazaqstandyq jastardyń sanyn arttyrsaq degen jospar bar», - dedi «Halyqaralyq baǵdarlamalar ortalyǵy» AQ-nyń prezıdenti Janbolat Meldeshov.

Aıta keteıik, «Rixos Khadisha Shymkent» qonaq úıinde  ótip jatqan shara eki kúnge jalǵasady.

QazAqparat

---