InfoHub Logo

Ýa dostar! Alla taǵalaǵa bireýden úırenip, ıakı ata-babanyń jolymen uǵyp, nanyp, ıman keltirgen kisi de musylman bolady. Olaı da bolsa óz aqylymenen oılap, osy dúnıeniń, bir qudiretti kúshti ıesi bolsa kerek dep, oz aqylymenen dálel tappaǵan kisi qatty kúnáhar bolady jáne ondaı kisi shaıtannyń azǵyrýyna, bireýdiń aldaýyna erip ketýge jaqyn turady. Qudaı taǵala barshamyzdy saqtasyn, adam shyn aqyl kózimenen qarasa, osynsha neshe túrli ǵalamdy jaratqan bir ıesi bar ekenin bireýden úırenbeı-aq bilse kerek. Quranda Alla taǵalanyń barlyǵyna dálel aıat bek kop, alaıda bolsa aqylmen oılap bilýge buıyrǵan aıatty aıtaıyn.

«Qul ýnzýrý mázá fıs-samaýatı ýal-ardı» — maǵynasy: Aıt, áı, paıǵambar, quldaryma qarańyzdar, aqyl kózimenen aspandaǵy hám jerdegi barsha jaralǵan nárselerge degen. Álbette, solarǵa qarasańyz, qudiretinde ólsheý joq. Bir ıesiniń barlyǵyn bilesiz. Jaǵypar, Sadyń haziretteri aıtqan eken: Alla taǵalanyń barlyǵyna bal jıatuǵyn aradan artyq ne dálel kerek kishkentaı nárseniń artynda bal, aýzynda ýy bar. Ol ekeýi taýsylmaıdy da, bir-birine qosylmaıdy, — degen. Jáne shaıqy Saǵdı degen kisi aıtqan parsysha beıit: «Bark darahtan sóz dar nazar-ı-hýshıar-hár varqysh dáfter ıst marýfat qard qor». Maǵynasy: aǵashtyń jasyl japyraǵyna aqyl kózimenen qarasańyz, árbir japyraǵy Alla taǵalany bildirýge bir kitap syqyldy emes pe? — degen.

Jáne adam oılaý kerek: osy meni kim jaratty dep? Sonda anyq biledi: ózindeı bir adamzat jaratpaǵanyn, ákem jaratty deýge de bolmaıtuǵynyn. Ákem sebep boldy dese, onyń, ákesiniń jaratylýyna kim sebep boldy? Sóıte-sóıte Adam paıǵambarǵa kim sebep? Aqyrynda barsha sebepterdi birinen biri sebep qylyp jaratqan bir qudiretti kúshti ıe kerek bolady. Sol ıe — Alla taǵala. Jáne adam oılaý kerek: qaıdan shyqtym, ne úshin jaraldym, túbinde ne bolamyn dep. Osylaısha oılaǵanda, álbette, joqtan bar qylyp bir qudiretti, kúshti Alla jaratty. Ne úshin jaratty? Jaratqan ıesin bilip, soǵan qulshylyq qylsyn dep jaratty. Aqyrynda ne qylady? Kimde-kim jaratqan ıesiniń ámirine moıynsunyp qulshylyq qylsa, ony qup qaldyrmaı taýsylmas rahat berse kerek. Egerde ámirine moıynsunbasa — oǵan taýsylmas ǵazap qylsa kerek. Nege deseńiz, osynsha ǵalamdy bosqa jaratýdyń qısyny joq. Aqyrynda joq bolyp ketetuǵyn qylyp jaratpasa kerek. Onda ánsheıin bir oıyn syqyldy bolady ǵoı. Aıatta uqtyryp aıtqan: «ýa ma halaqnas-samaǵa ýal-arda ýa ma baınahýma laǵıbına» . Maǵynasy: Aspan menen jerdi hám onyń arasyndaǵy barsha nárselerdi oınap jaratqanym joq, — degen. Endi joǵarǵy aıattyń maǵynalaryn hám aıtylǵan dálel sózderdi anyqtap uǵyp oılasańyz, Alla taǵalanyń barlyǵyna sheksiz kóńilińiz nanar.

---