Aqyl degen ólsheýsiz bir jaryq nur,
Sol nurdy tán qamy úshin jan jumsap júr.
Taǵdyrdyń qıyn, syrly sıqyrymen
Jan tánge, aqyl janǵa mataýly tur.

Jan tynyshtyq tappaıdy tán qamyn jep,
Tán buzylsa, turaǵym buzylar dep,
Ystyq, sýyq‚ ashtyqtan saqtaý úshin
Zulymdyq pen aılany qylady sep.

Aıýan – etin, terisin, sút pen kúshin,
Ara – balyn, sý – balyq, jer – jemisin,
Qus – denesin‚ júni men jumyrtqasyn
Saqtap júr ǵoı deısiz be adam úshin.

Olardyń da oıy bar ósip-ónbek,
Kimge ońaı ómir ótip, oty sónbek?
Adamnyń taza aqyly jandy qımaı,
Amalsyz qıanatqa o da kónbek.

Sóıtip aqyl bere almaı adal kómek,
Zulymdyqpen adamdy adam jemek.
Adal eńbek, aq peıil, meıirim joq –
Osy bolar taza aqyl óldi demek.

Sondyqtan adam – zalym, álemge jaý,
Ebin tapsa, qoımaıdy eshkimdi saý.
Jer bilse adamzattyń bul qylyǵyn
Ústinen bárin tógip tastar edi-aý.

Olaı qylmaı, bılese bárin aqyl,
Esh qıanat qylmasa zorlyq, taqyl.
Taza eńbekpen taǵdyrdan paıdalansa,
Adamdy sonda adam degen maqul.

---