InfoHub Logo

Bir myrza ormannan bir aıý balasyn ustap alyp, úıine alyp kelip, sonsha jaqsy kútip asyrapty. Bir kúnderde myrza qatty aýyryp, bir aıdaı tósekten turmaı jatyp, sol ýaqytta aıýdy da qaraǵan kisi bolmaı, bul da qatty júdep zaryǵypty. Aýrýdan az-ǵana táýir bolǵan soń, myrza bir kúni dalada, esik aldyna otyryp, kúnniń jylysymen maýjyrap qalǵıdy, biraq mańdaıyna, betine shybyn qonyp, shydatpaıdy. Sonyń bárin de manaǵy aıý kórip otyr eken. Myrzaǵa tynyshtyq bermegeni úshin shybynǵa qatty keıidi. Sóıtip, aıý yza bola tura julqyp ketkende shynjyry úzilip ketip, júgirip bardy da, myrzanyń betine tabanymen salyp kelip ketkende, myrza qalpaqtaı ushyp, sol jerde-aq jan tapsyrdy deıdi.

Bul is Dáýit paıǵambardyń zamanynda bolǵan eken. Aıýdy halyq paıǵambarǵa súıretip alyp bardy, buǵan qalaıynsha jaza beremiz dep.

Áziret Dáýit aıýdan surady:

— Ne sebepten qojańdy óltirdiń?

Aıý jylap aıtty deıdi:

— Qojam meni balasyndaı kútip, asyraýshy edi, ol aýyrǵan ýaqytta meni kútken kisi bolmaı, qojamnyń jazylýyn tilep zaryqtym. Búgin sol aýrýdan táýirirek bolyp, qojamnyń dalaǵa shyqqanyna qýanyp qarap turǵanymda, myrza esik aldyna otyryp, qalǵıyn dep edi, shybyndar tynyshtyq bermedi. Soǵan ashýym kelip urǵanymda qojam, ne sebepten ekenin bilmedim, ólip qaldy. Men qojama qastyq oılamadym, shybyndy qyraıyn dep edim, — dedi.

---