InfoHub Logo

Aqtóbe oblysynyń bilim berý basqarmasy baǵasy 10 000 teńgeden asatyn gadjetterdi qoldanýǵa tyıym saldy, dep habarlaıdy mgorod.kz.

Sheneýnikterdiń aıtýynsha, jańa tártipti pedagogtar, ata-analar jáne oqýshylardyń ózderi maquldaǵan. Bul bastama eń aldymen oqýshylardyń densaýlyǵy men qaýipsizdigine baǵyttalǵan.

Statısıkalyq málimetterge súıensek, bastaýysh synyp oqýshylarynyń 5-7% alystan nashar kóredi, al 10-11 synypta bul kórsetkish 20% deıin jetedi. Bilim berý mamandary munyń sebebi smartfon qoldanǵannan degen tujyrym jasap otyr. Smartfondarǵa tyıym salýdy basqarmadaǵylar oqýshylardyń qymbat buıymdarynyń urlanýymen de baılanysty.

«Mektep qabyrǵasynda smartfondarǵa tyıym salýdan bala men ata-ananyń baılanysy úzilip qalatynyn bilemiz. Sondyqtan, mekteptiń ishki tártibine quny 4 AEK-ten aspaıtyn arzan telefon alyp kirýge ruqsat berý jóninde ózgerister engizildi», - dedi Aqtóbe oblysy bilim berý basqarmasynyń basshysy Sáýle Ómirbekova.

Sáıkesinshe, endi oqýshylar quny 10 000 teńgeden aspaıtyn telefondar ákele alady. Sonymen qatar, bilim berý basqarmasy eshkim oqýshylardyń qaltasy men portfeline tintý jasamaıtynyn basa aıtty. Smartfonmen kózge túsken balaǵa eskertý jasalady jáne ata-anasy shaqyrtylady. Ata-analardyń ózi smartfonǵa tyıym salý týraly jańalyqty birden qabyldaı qoımady.

---