InfoHub Logo

Asanáli Áshimov — qazaq kınosynyń juldyzy, akter, kınorejısser, profesor. Onyń oınaǵan rólderi halyqtyń júreginen oryn tapty. Olar — «Atamannyń aqyry» (1970), «Qyz Jibek» (1971), «Transsibir ekspresi» (1977), «Nannyń dámi» (1979), «Túrksib» (1986) fılmderi.

Asanáli Áshimov 1937 jyly 8 mamyrda Jambyl oblysy Sarysý aýdanynyń Baıqadam aýlynda dúnıege kelgen. Qatal soǵys jyldary ótken balalyq shaǵy týraly akter: «Alǵashqy qar jaýǵansha jalań aıaq júrdim. Bir kúni sabaq kezinde qalyń qar jaýǵan edi. Barlyq synyptastarymdy ata-analary úılerine alyp ketti. Al men sýyq saz mektepte jalǵyz qaldym. Ol kezde toǵyz jasta edim. Túni boıy qatty qoryqqanym sonshalyq, tańerteń mektepten on jasqa eseıip shyqqandaı boldym» dep esine alady.

Qurmanǵazy atyndaǵy Qazaq memlekettik konservatorıasynyń bolashaq stýdenti bola júrip, A. Áshimov «Botagóz», «Ertistiń asaý tolqynynda» atty fılmderge túsken. 1964 jyly ol M. Áýezov atyndaǵy Qazaq akademıalyq drama teatrynyń sahnasynda kóptegen jarqyn beınelerdi oınady. «Aıdahar jyly», «Aty ańyzǵa aınalǵan Shoqan» fılmderi úshin Qazaq KSR Memlekettik syılyǵyna ıe boldy. Óz kınostýdıasy túsirgen «Elim-aı», «Qozy Kórpesh — Baıan Sulý» fılmderinde túsken.

A. Áshimov 1980 jyldan beri KSRO halyq ártisi, KSRO jáne Qazaqstan Memlekettik syılyǵynyń laýreaty. 2000 jyly «Tarlan» syılyǵynyń ıegeri atandy.  2017 jyly Qazaqstannyń Eńbek Eri atandy.

---