InfoHub Logo

Parlament Májilisiniń depýtaty Ashat Aımaǵambetov bilim grantyn jeńip almaǵandarǵa áli de aqysyz oqýǵa túsýge bolatynyn aıtty.

Atap aıtqanda, 5 tamyz kúni Ǵylym jáne joǵary bilim mınıstrliginiń resmı saıtynda jáne áleýmettik jelilerinde 2023-2024 oqý jylyna arnalǵan bilim granty ıegerleriniń tizimi jarıalandy.

Joǵary oqý oryndaryna qujattardy tapsyrý 25 tamyzǵa deıin júzege asyrylady.

«Grantty jeńip almaǵandarǵa ne isteýge bolady? Kommentterde jáne jekeme de osyndaı suraq kóp qoıylyp jatyr. Sondyqtan qysqasha óz oıymdy jazaıyn. Bastysy, áli de grantty jeńip alýǵa múmkindik bar. Nege? Birinshiden, ıgerilmegen birneshe myń grant qaıtadan úılestiriledi. Iaǵnı grant alǵan talapkerlerden keıin turǵan talapkerlerge UBT-da jınaǵan upaı sanyna sáıkes beriledi. Sony kútýge bolady. Ekinshiden, ákimdikterdiń granttary bar. Birneshe myń grant jergilikti búdjetten bólinedi. Úshinshiden, «Qazaqstan halqyna» qorynyń granttary taǵy bar», - dep jazdy A. Aımaǵambetov áleýmettik jelidegi paraqshasynda.

Onyń aıtýynsha, keıbir talapkerler túrli sebep boıynsha jeńip alǵan granttarynan bas tartýy múmkin. Olardyń sany da az bolmaıdy. Bul granttar da qaıtadan bólinedi.

«Tipti eshteńe bolmasa, ýnıversıtetke aqyly túrde túsip, keıin jaqsy oqyp, GPA joǵary bolsa, bilim alý kezinde bosaǵan bos grantty utyp alýǵa bolady. Sonymen qatar, «gap year» arqyly bir jyl daıyndalyp, qaıtadan UBT tapsyryp, grantty jeńip alý múmkindigi bar. Ol meniń óz basymnan ótken oqıǵa. Bul da jaqsy sheshim», - dedi depýtat.

«Kolejge túsýge bolady. Kolejde grant kóp, qajet mamandyqtar boıynsha kolej bitirgender naryqta tapshy. Kerek bolsa, keıin ári qaraı JOO-ǵa túsip, qysqa merzimde joǵary bilim alyp shyǵýǵa da bolady. Kórip otyrǵandaryńyzdaı múmkindikter óte kóp. Bári alda. Tolyq málimet alý úshin ýnıversıtetterdiń qabyldaý komısıasyna jolyǵý kerek», - dedi Ashat Aımaǵambetov.

---