InfoHub Logo

Ata-analar balabaqshadaǵy tamaqtyń qunarlylyǵyn kóre alady. Astana qalalyq bilim berý basqarmasy basshysynyń mindetin atqarýshy Ánýar Janǵozınniń aıtýynsha, osy ispetti bastamalar "Smart Balabaqsha" jobasy aıasynda qolǵa alynady.

"Jobanyń birinshi baǵyty ol - qaýipsizdik. Ondaıda balabaqshanyń barlyq kirý men shyǵý jaqtarynda beınebaqylaý júıesi ornatylady. Sosyn ata-analardyń kelip-ketkenin tirkeý júıesi bolady. Bul degenimiz, árbir ata-anaǵa elektrondy kartochka beriledi. Sóıtip, barlyq ata-analardyń kirgeni men shyqqany tirkelip otyrady. Balabaqshaǵa kelgen balalardy tirkeý tetigi de engiziledi. Budan bólek, arnaıy densaýlyq tólqujatynda árbir balanyń aýrýy, oǵan jasalǵan ekpeler jáne taǵy basqa medısınalyq aqparat bolady. Al jeke kabınet arqyly ata-analar óz balalarynyń jetistikterin, bilim berý kestesin, as mázirin, tipti tamaqtyń qunarlylyǵyn kóre alady", - deıdi Janǵozın.

Onyń sózine qaraǵanda, qazirgi kezde "Smart Balabaqsha" jobasy qaladaǵy eki balabaqshada pılottyq rejımde iske asyp jatyr. Mamyrdyń aıaǵyna deıin osy jumystyń qorytyndysy shyǵarylady. Sodan keıin ony basqa da balabaqshalarǵa taratý josparlanǵan.

Aıta keteıik, búgin Astana sarapshylary klýbynyń kezekti otyrysynda elordadaǵy bilim berýdi damytýǵa arnalǵan baǵdarlamanyń jobasy talqylandy. Sonyń aıasynda qaladaǵy barlyq bilim berý mekemelerinde aýdıt ótkizip, bilim berý sapasyn kóterýdiń ózekti máselelerin anyqtaý josparlanyp otyr.

---