InfoHub Logo

        Búgin taǵy da tús kórdim. Tańǵy araı. Meıirim toly bir tanys ólke óz-ózine shaqyrady. Tanaýymdy qaryp ótken tańǵy salqyn aýa munsha jyly seziletinin kim bilgen? Jaǵasynda saıran salyp, qumnan soǵylǵan qalashyqtyń hanshaıymy sezinetin arǵy beti kókjıekpen astasqan ózimizdiń typ-tynyq kól jaǵasynda kele jatyrmyn. Meniń balalyq bal dáýrenimniń bar esteligin, shad-shadyman kúlkimdi qoınaýyna saqtap qatparly jar ájimdi qart sekildi kúlip qaraıdy. Aıaǵy áste taıyp sonaý basynan tómenge deıin syrǵanap qulap, sonan soń rahattana kúletin balapan qyzdyń boıjetip, ózimenen boı jarystyryp turǵanyna tańyrqap qaraıtyn sekildi. Qorazdyń ký-ka-re--ký-lap shaqyrǵan jaǵyna bet aldym.

       Kóterilgen kúnmen talasa oıanyp, aýyl adamdary sharýasyna kirisip ketkeli qashan. Qoı-eshkilerdi shetennen shyǵaryp, kórshilerimen shúıirkelesip atam júr. Nemereleri kórpesin tartyp alyp, ádettegideı ájem tońyp oıansa da, "Nurbolym" (minezi er balanykyndeı dep er balanyń atymen ataıtyn) dep erekshe mahabbatpen ıiskep, shelegin sómke sekildi qolyna ilip, móńiregen buzaýlardy enesimen tabystyrýǵa bet alady. Jeńgem qaınatqan samaýyrdyń kerneýinen býdaqtata shyǵyp, masahanada tátti uıqyda jatqandardy tútin túrtkilep oıatýda. Úıdegiler birinen soń biri sap salqyn sýmen betin shaıyp úlken dastarhan basyna jınalady. Ájemniń ózi jasaǵan irimshik-qurty, kúbi pisip keshe ǵana jınaǵan maıy, ıisi murynyńdy jaratyn jańa ǵana shoqqa pisken ystyq nany, samaýyrdyń yzyly, baýyrlarymnyń ortasynda erkelep ishken shaıdyń bári qandaı rahat. Álemniń nebiri baılyǵymen tarazyǵa qoısań da dál osy sát aýyrlanyp kez kelgen qundy zatty da ońaı eńserip, tómen basyp jata beretin sekildi. Atam ádetinshe, shaıdy uzaq bappen iship otyryp, meniń jaıymdy surap meıirlene:

     - Qulynym, sabaǵyń qalaı? -dep suraýly júzin maǵan aýdardy. Dál osy sátte telefon qońyraýynan oıandym. Saǵat 8:12 -den ketipti. Telefondy kótersem anam eken. "Qyzym, seni saǵynyp oıandym. Demalysta kelip ketseıshi", - deıdi. Anashym, qyzyńyz da úıin, balalyǵyn saǵynyp júr...

---