InfoHub Logo

Ulybrıtanıadaǵy Ýorık ýnıversıtetiniń stýdenti Sanjar Taıjan - zamandastarymen birge amerıkandyq mıllıarder Ilon Masktyń Haıperlýp (Hyperloop) baıqaýynda úzdikterdiń qatarynan tabyldy.

Sanjar Taıjan álemniń ozyq oqý oryndarynyń biri Ýorık ýnıversıtetiniń 50 úzdik stýdenti. Qazaqstandyq stýdent keleshektiń kóligin oılap tabý úshin komanda jasaqtaǵan. Seriktesteri qatarynda bolashaq ınjener, fızık jáne bıznesmender bar. Týǵan elderiniń geografıasy da árqıly: Anglıa, Ispanıa, Indıa, Avstrıa, Ońtústik Koreıa jáne basqa da memleketter.

«Sanjardyń jaýapkershiliginiń júgi óte aýyr. Ártúrli fakúltetterde bilim alyp, oqý kestesi árqıly bolǵanyna qaramastan óte kóp adamnyń basyn qosa bildi. Ol sondaı-aq bıznes pen ındýstrıa úshin ne kerek ekendigin jaqsy biledi. Ol komanda úshin óte kóp nárse jasady», - deıdi Warwick Hyperloop jobasynyń qatysýshysy /Ońtústik Koreıa/ Hánsog Lı.

Sanjardyń komandasy energıa únemdegish qabilettiligi jáne jyldamdyǵy óte joǵary kapsýla jasap jatyr. Onyń kómegimen jolaýshylar men júkterdi dybys jyldamdyǵymen qubyr jelisi arqyly tasymaldaýǵa múmkindik týmaq.

Komanda jobalaǵan kapsýla magnıtti óriske negizdeledi. Ol áıgili Ilon Maskke tıesili aeroǵaryshtyq kompanıada synaqtan ótetin bolady. Sanjardyń jobasy SpaceX Haperloop Pod Competition týrnırine joldama alǵan 1600 qatysýshynyń arasynan úzdik 35 komanda qatarynan tabylyp otyr.

«Bizdiń ýnıversıtette birneshe stýdenttik joba bar. Biraq bul ǵalamdyq joba bolǵandyqtan stýdentterdiń nazaryn erekshe aýdaryp otyr. Keleshekte ol jeńiske jetedi degen úmittemiz. Sanjardyń jáne onyń komandasynyń álemdegi kil myqtynyń biri bolatyndyǵyna senemiz», - deıdi WMG energetıkalyq ınovasıalyq ortalyqtyń bas ınjeneri Mark Amor-Segan.

Ótken jyly Sanjardyń batareıalardyń tozýyn boljaý boıynsha jeke jobasy Anglıadaǵy bakalavr stýdentter arasynda úzdik ınovasıa retinde tanylǵan. Ótken jazda Sanjar Jaguar Land Rover-de taǵylymdamadan ótip, jumysqa shaqyrý aldy. Biraq ol jeke startap jobasymen aınalysýy múmkin. Sondaı-aq qazaqstandyq Ilon Mask óz bolashaǵyn týǵan jerimen baılanystyrady.

«Ia, Qazaqstanmen baılanystyramyn. Biraq aldaǵy 10 jylda ózimdi tehnıkalyq turǵyda shyńdap, jobalarymdy damytqym keledi. Meniń bolashaǵym elde ekendigine úmitim zor. Ol jaqta otbasymmen turǵym keledi. Óıtkeni boıymda qazaqtyń qany bar jáne áldebir jobany qolǵa alǵan kezimde Qazaqstanǵa paıdam tıse eken dep oılaımyn», - deıdi Warwick Hyperloop jobasynyń jetekshisi Sanjar Taıjan.

Sanjar keleshekte Uly jibek jolymen júk tasymaldaý isine ózindik úlesin qosqysy keledi. Inovasıalyq jobasyn júzege asyrý úshin halyqaralyq memleketterdi tartý onyń basty armany.

---