InfoHub Logo

Bizdiń Buqarbaı oıyn-qaljyńǵa sheber, sózde de, iste de utymdy adam edi. Birde ol Zaporoje selosymen irgeles aýylǵa barady. Ondaǵy tanystarynyń biri eginin bastyryp, astyǵyn qaýyzdap jatyr eken. Sálemdesip, «qyrman tasysyn!» degen tilegin aıtyp tura beredi, — dep bastady Jákejan áńgimesin. — Qyrman ıesi ushyrylyp, tazartylǵan bıdaıyn saraıyna tası bastady. Bıdaı salynǵan qaptardy kóterip, arqasyna tıep jatqan kezde at ústinde turǵan Buqarbaı birneshe ret «áýp!» dep dem beredi.

Kelesi kúni Buqarbaı atyn jegedi de, arbasyna úlken bir qap salyp alyp, keshegi ózi kelip ketken qyrmanǵa keledi. Dıqan jumys istep jatyr eken, oǵan qapshyǵyn kórsetip: «Keshegi úlesimdi alǵaly keldim», — deıdi. Dıqan: «ol qandaı úles, ne úshin?» — dese, Buqarbaı: «Sen bıdaı toltyrylǵan qaptaryńdy kótere almaı jatqanda, men «áýp» dep dem bergemin, sol úshin», — dep qapshyǵyna qyzyldaǵan bıdaıdy sala bastaıdy.

Buqarbaıdyń minezine tanys, onyń súlikteı qadalǵan jerinen ózine keregin almaı ketpeıtinin biletin dıqan oǵan lám demeıdi. Buqarbaı bes puttyq qapty toltyryp, arbasyna tıeıdi de, óz jónine kete barady.

 

---