InfoHub Logo

Ertede Syr eliniń úsh aqyny jaılaýdaǵy mal baqqan aýyldarda bir jaz bolyp, qaıtý saparynda Syrdarıa jaǵasynda, qalyń jyńǵyl arasyna tigilgen bir qarasha úıge kelip túsedi.

Bul — Syr boıyna sarańdyǵymen aty shyqqan Aıgóbek degen baıdyń úıi eken. Aıgóbek toǵaı tolǵan jylqysy, qora tolǵan qoıy bolsa da, ómirinde basyna bútin úı tigip, ústine táýir kıim kımegen, qarny toıyp as ishpegen kádimgi Qarabaıǵa uqsaǵan sarań bolsa kerek.

Alys joldan sharshap-shaldyǵyp kele jatqan úsheýine Aıgóbek jýyǵyraqta sýsyn bergize qoımapty. Álden ýaqytta dastarqan jaıǵan bolyp, Maıly aqynnyń aldyna bir kese shaı, Mádi aqynnyń aldyna bir shókim sarymaı qoıyp, eki ýys qýyrǵan bıdaıdy shasha salypty.

Sonda Maıly turyp, oń jaǵynda otyrǵan Mádiniń tizesine tizesimen nuqyp qoıyp:

— Qyzyl shaıdan júregim úrkip otyr, — depti.

Mádi jalma-jan jalǵastyryp:

— Maı jegendeı júregim kilkip otyr, — dep Bákeńe qarapty. Báıdebek te toqtalmastan ilip áketip:

— Eki-aq ýys jem jegen tory attaı bop, Bákeń de at dorbasyn silkip otyr, — dep ornynan ushyp turypty.

Masqaraǵa ushyramasam ıgi edi dep oıǵa kelgen Aıgóbek sasqanynan:

— Oı, joıqandaryń qurysyn, sender kádimgi júırikterdiń dál ózderi ekensińder ǵoı, men jaı bir jolaýshy ma dep mensinbeı otyr edim. Aıgóbek sarań dep naızanyń ushyna ilip, jurt aldyna mazaqqa aınaldyra kórmeńder, masqara ǵyp júrmeńder, — dep bas ıip quldyq qypty. Jaıylyp tósek, jantaıyp jastyq bolyp, qoı soıyp, et asyp aqyndardy syılap shyǵaryp salǵan eken.

---