InfoHub Logo

Áımı kereıdiń sherýshi rýynan týǵan bireýdiń jalǵyz ulyna aıttyrǵan naıman rýynyń qyzy eken. Qalyń maly berilip bolyp alǵaly otyrǵanda, baqytqa qarsy kúıeý jigit qaıtys bolady. Jigittiń jyly ótkennen keıin «qyzǵa bireýler qudalasqaly jatypty» degen habar kereı jaǵynyń qulaǵyna tıedi. Kereı jaq alatyn jigitin qosyp, qyz jaqqa adam jiberedi. Biraq qyz barǵan jigitti jaratpaıdy. Quda jaq: «Qalyń maldy qaıtaramyz» dep jat nıet bildiredi. Jigit jaq bul aqýaldy orys jerinde sıeze júrgen Beısenbige habarlaıdy. Sol dáýirdiń erejesinde qyzdy aıttyrǵan jigit ólse, qyz sol eldegi óziniń tańdaǵan jigitine barady. Eger ol jigit almasa, ıakı alýǵa jaǵdaıy jar bermese, qalyń mal salaýat bolady. Qyzdyń talabyna laıyqty jigit shyqpasa, qyz jaq qalyń malyn qaıtaryp berip, qyzdyń bas erkindigin alady eken.

Bejeń qaıtar jolda kelip qudalarmen sóılesse, olar qalyń maldy qaıtaramyzdan basqany aıtpaıdy. Beısenbi: «Qalyń mal qaıtarý qashpas, men qyz lebizin óz qulaǵymmen estisem, — dep Áımıdi shaqyrtyp alyp, — qudalasqan jigitiń baqytqa qarsy qaıtys boldy. Bul — taǵdyrdyń isi. Atamyz qazaqta «jesir erden ketse de, elden ketpeıdi» degen salt bar. Myna jigitterden kóńiliń súıgenin tańda, kóńiliń tolmasa, búkil kereıdi tańdaýyńa da bolady», — deıdi.

At-ataǵy elge áıgili Beısenbini Áımı de syrttaı bilýshi edi. Bul ret Beısenbiniń kóz tartarlyq tulǵasy men kóńil tolarlyq kelbetin kórgende Áımıdiń ishteı ǵashyqtyq sezimi qozǵalyp, Beısenbige: «Kereıden ózim tańdaǵan jigitime barýyma bola ma?» — dep suraıdy. Beısenbi: «El salǵan jol, jalǵasyp kele jatqan salt qoı, nege bolmaıdy? Bolady!» — deıdi.

Ójet Áımı: «ondaı bolsa, men ózińdi tańdaımyn, basqańa barmaımyn», — deıdi. Beısenbi bir jaǵynan ózi aıtqan sózinen bultara almaıdy, endi bir jaǵynan Áımı syndy symbatty, sulý, ójet arýdy ózi de shyn júreginen súıedi. osylaısha, Áımı óziniń tamasha minez-qulqy, unamdy is-áreketi, aq jarqyn, meımandos, saýyqshyl ereksheligi jáne zeıindi zerdeliligimen jurtqa da, Beısenbige de unaıdy. Bejeńniń aqylyna  qosyp, daý-sharlarǵa bılik aıtý, eldi bereke-birlikke shaqyrý is terine de aralasady. El aldynda zor bedelge ıe bolady. Túsetin túsel, keletin qonaq Áımı otaýyna aýady. Áımıdiń osyndaı is-áreketine súıingen Bejeń óziniń kóńil-kúı, oı-órnegin «Áımı» atty kúı qylyp qaldyrady.

---