Balalyq, senen artyk kúnim bar ma,
Bala kúnde boıymda minim bar ma?
Bárine jetem deımin, alam deımin,
Jas qıalda toqtalyp, tynym bar ma?
Balaǵa teń kóriner baı men kedeı,
Súıedi jaksy, jaman, nadan demeı.
Kúná, sumdyq degendi ol bilmeıdi,
Aıyrmasyz er, áıel bári birdeı.
Jaqyn-alys dep bilmes alalaýdy,
Aqqa jaýyp jalany qaralaýdy.
Ómir, ólim ne nárse ujmak, dozaq,
Bilmeıdi baq, kúndeý men tabalaýdy.
Qaıǵy, qyzyq ne nárse, dámin bilmes,
Baılyq, baqyt degendi kózine ilmes.
Jaqsy, jaman sózderdiń parqyn aıyryp,
Ne deseń de tańdanyp, qulaq túrmes.
Shirkin-aı, balalyq kún, ótesiń-aý,
Artyńa qaıyrylmaı-aq ketesiń-aý.
Jigittikti kárilik qýyp jetip,
Ajal-daǵy, keshikpeı jetesiń-aý.
Qyzyqty, tátti ómir, bitesiń-aý,
Aldynan ajal tosyp, kútesiń-aý:
Týǵanda qyzyqtaǵan jańa jandy,
Týmaǵandaı bir kúni etesiń-aý.

---