InfoHub Logo

Memleket basshysynyń tapsyrmasyna sáıkes 2 jastan 6 jasqa deıingi balalardy mektepke deıingi bilimmen qamtý maqsatynda jyl sońyna deıin respýblıka boıynsha 81 myń jańa oryn ashý josparlanyp otyr. Elimizde 11 317 mektepke deıingi uıym jumys jasaıdy, balalardy qamtý deńgeıi - 89,1%.

Oqý-aǵartý mınıstrliginiń málimetinshe, mektepke deıingi uıymǵa qabyldaý jyl boıy júrgiziledi.

Maýsym aıynda Almaty, Astana qalalarynda, Ulytaý, Qostanaı, Mańǵystaý oblystarynda jańa toptardy jasaqtaý aıaqtaldy.

Qalǵan óńirlerde bul jumys qyrkúıek aıyna deıin jalǵasady.

Kezekke qoıý jáne joldama berý elektondy júıe arqyly júzege asady.

Mektepke deıingi uıymdarǵa qabyldaý úshin kelesi qujattar talap etiledi:

1. Qabyldaýǵa arnalǵan joldama (berilgen kúnnen bastap 5 jumys kúni ishinde jaramdy);

2. Ótinish (Mektepke deıingi bilim berý salasynda memlekettik qyzmetter kórsetý qaǵıdalarynyń 5-qosymshasyna sáıkes nysan boıynsha);

3. Qyzmet alýshynyń jeke basyn kýálandyratyn qujat (ata-analarynyń biriniń nemese zańdy ókiliniń) nemese sıfrlyq qujattar servısinen elektrondyq qujat;

4. Balanyń týý týraly kýáligi nemese sıfrlyq qujattar servısinen elektrondyq qujaty;

5. № 065/e nysandy profılaktıkalyq ekpelerdiń kartasy;

6. № 027/e nysandy anyqtama;

7. psıhologıalyq-medısınalyq-pedagogıkalyq konsýltasıanyń qorytyndysy (erekshe bilim berýdi qajet etetin balalar úshin);

Aıta ketý kerek, qazirgi tańda balabaqshaǵa kezekke qoıý tártibine ózgerister engizilýde. Balany mektepke deıingi uıymǵa kezekke qoıý jáne qabyldaýdyń biryńǵaı bazasy qurylýda.

---