InfoHub Logo

Álemdegi eń keremet kınozal — mı. Biraq sen ony tek kitap oqyǵanda ǵana túsinesiń.

Skott Rıdlı

Barlyǵymyz bala-shaǵamyzdyń bilimdi bolýyn, kóp kitap oqýyn qalaıtynymyz anyq. Biraq osy bilimge baýlýǵa, kitapqa oqýǵa baǵyt-baǵdar kórsetip jatqanymyz qanshama?! Óıtkeni kitap oqý daǵdysyn qalyptastyrý ońaı sharýa emes. Kez kelgen nárseni májbúrlep istetý uzaqqa barmaıtyny sıaqty kitap oqý daǵdysyn qalyptastyrýda da májbúrleý iske aspaıdy. Kerisinshe májbúrlep qınap oqytý balada keri áser, kitapqa degen teris kózqaras qaldyrýy múmkin. Al sonymen qatar kishkentaı kezinde qalyptasqan daǵdylar adamnyń búkil ómirin túrlendiredi. Iaǵnı 10 jasqa deıingi merzim qıal kúshiniń jetilýi jáne kitap oqýdy jaqsy kórýi turǵysynda óte mańyzdy kezeń. Eger osy kezeńde bala kitaptan alshaq qalsa keıingi kezeńderde óz erkimen kitap oqýda qıyndyq tartady.

Kóringen kitapty oqı bergen jaramaıdy, kóńilde týǵan saýaldarǵa jaýap bere alatyn kitaptardy oqyǵan abzal.

Lev Tolstoı

Kitap oqý daǵdysyn qalyptastyrýda otbasynyń mańyzy zor. Bala úshin eń áserli tálim oshaǵy sanalatyn otbasyda eshkim kitap oqymaıtyn bolsa, balada da kitap oqý qalaýy bolmaıdy. Sondyqtan aldymen ózimizge qaraýymyz kerek. Úı ishinde kitap oqýǵa degen qyzyǵýshylyq bar ma?! Álde telefonǵa úńilip otyrýǵa beıimbiz be?! Aptada nemese aıda qansha kitap nemese qansha bet oqısyz?! Eń bolmaǵanda balany yntalandyrý úshin kitap oqyǵansymaq bolyp, yrymyn jasaı alasyz ba?!

Qolǵa túskenin emes, ábden tańdap-saraptap oqyńyz. Dil men janyńyzdy baıytyp, ony tárbıeleńiz.

Ivan Týrgenev

Kóp ýaqyt bólý de shart emes, jarty saǵat kitapqa kóńil bólseńiz nemese kitap oqyǵansymaq bolsańyz, balańyzdyń kitapqa qyzyǵýshylyǵyn oıata alasyz. Tipti balańyz oqý, jazý bilmeıtin bolsa da osylaı balanyń qyzyǵýshylyǵyn oıatýǵa tyrysý kerek. Balalarǵa arnalǵan kitapsha, jýrnal áperińiz. Oqý bilmese de betterin aqtaryp, sýretterin qaraıdy. Ózińiz de oǵan ishinen ertegi, áńgimelerin oqyp berińiz. Bir-eki ret oqyp daǵdyǵa aınaldyrsańyz, keıingi kúnderi balańyz oqyp berýińizdi ózi suraıtyn bolady.

Sizdi oılaýǵa májbúr etetin kitap qana óz mindetin tolyq atqarǵan kitap.

Dorotı Parker

Taǵy bir aıta ketetin jáıt teledıdar, ınternet, áleýmettik jeli, telefon sekildi kóńildi alańdatatyn, ýaqytty jeıtin dúnıeler bar. Osy dúnıelerge de oryndy shekteý qoıǵan jón.

Mádenıettiń máıegi — kitap.

Sherhan Murtaza

Qadirli zamandastar! Oqýǵa, oqyǵan urpaqqa qajettilik bar. Ulttyq jáne rýhanı qundylyqtarymyzdan bastap, keıin mamandyǵymyzǵa qatysty kitaptar men maqalalar oqýǵa qulshynys tanytaıyq. Gazet, jýrnaldardaǵy maqalalardan oqıyq. Gazet-jýrnaldan kitapqa ótý ońaı bolady. Bir kitapty kúnine 1-2 betten oqyp bastap ta osy jolda qadam tastaýǵa bolady. Ózimiz oqıyq, sonda bala-shaǵa da oqıtyn bolady.

---