InfoHub Logo

Ol qashan kórseń de kózi kúlimdep, tap-tuınaqtaı jınaqy júredi. Súıkimdi bala. Biz eki-aq kún birge boldyq, jýas syqyldy. Toıǵan qozydaı tompıǵan túrine qarap, «uıalshaq shyǵar» dep oılaısyń.

Ekeýmiz oıda joqta tanystyq. Aýylǵa jaqyndap qalǵanbyz. Jol jaǵalap bir bala ketip barady. Aıaǵyn ilbı basady.

— Myna batyrdy ala ketelik,—dep, shofer jigitke ótinish aıttym.

Kabına esigi ashylǵanda, bala toqtaı qaldy..

— Kel, balaqaı, otyr— dedi.

— Sálemetsiz be, aǵa?— dep, ol ishke endi.

— Qaıdan júrsiń?

— Tartymǵa baryp edim.

Kirshiksiz aq kóılegi, qyry pyshaqtaı qara shalbary nazarymdy aýdardy.

— Toıǵa barǵan sıaqtysyń ǵoı.

— Toıdan basqa jerde taza kıinýge bolmaı ma?!— dep, tańyrqaı kúlimdedi.

— E, nege bolmasyn?! — dedim sasqalaqtap.

Teńiz qoltyǵyndaǵy balyqshy aýylyna jetken soń, bala kolhoz keńsesine jol siltedi de, jónine ketti. Erteńine balany taǵy kezdestirdim. Mektebi keńseniń qasynda eken.

— Sálemetsiz be, aǵa,— dep kúlimdeı amandasty.

— Jaqash, neshinshide oqısyń?— dep suradym.

— Ekinshi klasta.

— Sabaq qalaı?

— Bes,— dedi ol, buǵan pálendeı mán bermesten. Qaıtarda óziniń júzim ósirip júrgenin aıtty. — Erteń bizdiń úıge kelip, meıman bolyńyz. Meniń júzimdigimdi de, salǵan sýretterimdi de kóresiz. Saǵateste keshikpeńiz!..

Kelesi kúni taǵy da teńizge bardym, balyqshylarmen jaqynyraq tanystym. Ozat zveno jetekshisi Jaqsybaıdyń isine qandym.

— Úıden dám tat,— dedi Jaqsybaı qart.

Osy arada tuıyqqa tirelip qaldym, Jaqashtyń úıine barýym kerek edi.

— Aıyp etpeńiz, osyndaǵy bir inim shaqyrǵan soń, soǵan ýáde berip qoıyp edim.Jaqsybaı qart renjigen joq.

Durys, qaraǵym, ýáde — qasıetti sert. Sózin jutqan adamda ne qadir qalady? Jolyń bolsyn!

Jaqashtyń úıine kelgenimde, Jaqsybaı qart aldymnan shyqty. Tańdanyp qaldym. Sóıtsem ol kisi kishkentaı dosymnyń ákesi eken.

Shaı ústinde qart jadyraı sóıledi. Sol keıpi Jaqanǵa uqsap ketti. Ekeýiniń keskin-kelbetindegi uqsastyqqa buǵan deıin qalaı mán bermegem?

Sol sát kóz aldyma baısaldy jigit bolyp ósken, tolarsaqtan sý keship, aý tartyp júrgen zińgitteı Jaqan elestep ketti...

---