InfoHub Logo

Baqyt-kez kelgen adamnyń ishki tebireniske,tolǵanysqa toly erekshe bir sezimi. Baqytsyz eshkim ómir súre almaıdy-aý,sirá. Ol adamnyń rýxanı azyǵy,sarqylmas kúshi men marjandaı asyl tasy. 

Menińshe,baqyttyń negizderi birshama. Eń aldymen,baqyttyń naǵyz janary-ata-ananyń barynda,olardyń denderiniń saýlyǵynda,júrekterindegi qýanysh pen rıasyz kúlkilerinde... Rasynda da,ata-ana ár balanyń janashyry,qorǵandary men súıeýleri. Olarsyz eshbir bala ózin qaýqarly sezinbes. Qulasa,súrinse-demep,árdaıym qoldaý kórsetip júretin, tek qana áke men ana. 

Baqyt-bul ár kisiniń basynan ótken baldaı tátti balalyq shaǵy. Balalyqpen eskermeı ketken talaı jáıttar qazir kóz aldymda. Esh ýaıym-qaıǵysyz,jaıbaraqat kez dep bala kezdi aıta alamyn. Esh nársemen júıkeni juqartpaı,basty da aýyrtpaı júretin "balalyq". Árkez shat-shadyman kúı keship,máz-meıram bop kúletin "balalyq". Dúnıedegi bul erekshe shaqqa eshteńe de jetpes. 

Baqyt-bul jastyq. Balǵyn jastyq shaq. Jas kezdegi baqytty sezinýdiń ózi bir baqyt. "Jastyq-jalyn" dep bekerden-bekerge aıtylmaǵan. Osy mezgildegi kóktem aıy erekshe ótedi. Jastyqtyń ynta-yqylasy,talaby baqyt syılamaı turmaıdy. Keremet,bárinen de ózgeshe áserge bólep,búkil álemmen sáıkestik pen úndestikte bolatyn mezet-jastyq shaq. Bul kezeń - qajymas qaırat pen jigerdiń shyńy,bıik munarasy. Sondyqtan da,jastyq kez uly bastamalar jınaǵy. Osy sátte jaıqalmaı,gúldenbegende,baqytty sezinbegende,qashan kórkeıemiz?! 

Ómirde baqytty bolýdyń joldary jeterlik. Óz-ózimizdiń kóńilderimizdi kótermesek,baqyt nuryna bólenbesek,bul jalǵan da óziniń ásemdigin joǵaltady dep oılaımyn. Osy álem tek baqytpen ushtasady. Bizdiń jahanymyzdy myń qubyltyp,túrlendire alatyn - baqyt. Onsyz dúnıe kúreń kúz, qatań,ári qalyń qys mezgilindeı,kúńirep,tunjyraıǵan aspandaı,solyp qalǵan gúl tárizdes bolar edi. 

Baqyt - kúndeı jarqyraǵan,juldyzdaı jymyńdaǵan balǵyn sát.

Meniń baqytym-júregimde,jaımashýaq,áserli kúnderimde. Baqytqa jetý jolyn men ózim jasaımyn,ózimniń is-áreketterimniń nátıjesine de men ǵana sebepkermin. Kóbisi baqytty bolýdyń syryn izdep,áýre-sarsańǵa túsedi. Alaıda,baqyttyń dál janynda ekendigin kóp túsine bermeıdi. Baqyt-ol adamnyń densaýlyǵy,onyń kúndelikti jumysy,esh qaıtarylmas baǵaly ýaqyty,qasyndaǵy jaqsy kóretin jandary... Keıbireýleri,baqytty aqsha men mal-múlikte,ataq pen dańqta,mansap pen dúnıequmarlyqta dep oılaıdy. Árıne,bul jalǵan pikir. Munyń bári de búgin bolsa, erteń- bolmaıdy. Olardyń arttarynan júgirý - bul bos áýreshilik. Sondyqtan,qazirgi sátte qasyńnan tabylǵan izgi nıetti jandardy baǵalap,olardyń qadirlerin túsiný mańyzdy. 

Baqyt jaıly sóz taýsylmaıdy. Ony ári qaraı da,órbitip alyp ketýge bolady. Degenmen,uzyn sózdiń qysqasy dep aıaqtaı kele,"baqytty syrttan emes,óz júregińnen taba bil" dep aıtqym keledi.

Qasıet Bahkereıqyzy

---