InfoHub Logo

Maqsaty: Bilimniń sara joly mektepten bastalatynyn, bilimniń keń dúnıede ómirge esik ashatynyn sezindirý. Bilimge degen qushtarlyǵyn arttyrý, oqýǵa, bilimdi bolýǵa shaqyrý. Mektepti, ıaǵnı bilim ordasyn, ustazdaryn qurmettep, eńbekti baǵalaı bilýge tárbıeleý. Ata - anasynyń, Otanynyń adal ul - qyzy bolýyna jeteleý, tárbıeleý. Bastaýysh synybymen, bilimniń alǵash esigin ashqan ustazdarymen qoshtasa otyryp, joǵary synyp muǵalimderine ár balany óz ereksheligimen tanytý, sát – sapar tilep tabystaý.
Túri: erteńgilik
Kórnekiligi: Slaıd prezentasıasy: «Meniń synybym», sharlar men gúlder t. b
Aýdıvızýaldy quraldar: mýltımedıalyq proektr, mýzyka ortalyǵy, sıntezator.
Barysy:
Zalda A. Eńsepovtiń kúıi «Balalyq shaq» áýeni oınap turady.
- Synyp jetekshisi kelgen qonaqtardy otyrǵyzyp, kirispe sóz sóıleıdi:
- Keshe ǵana bilim ordasyna tarydaı bolyp enip, jan – jaqtaryna tańyrqaı qarap, júreksine tabaldyryq attaǵan balapan edińder. Búgin, mine, 4 jyl bilim nárimen sýsyndatqan, qalam ustap, árip tanytqan, bilimniń negizi – bastaýysh satysymen de qoshtasar sát taıandy. Adam ómirindegi eń bir tátti, alańsyz baqytty shaq – balalyq shaq. Endeshe, sol balalyq shaqtaryńnan máńgilik esterińde qalsyn, balalyqtyń jaqsy bir elesi bolyp qalsyn degen maqsatpen, búgin dástúrli úlken qýanyshty sharaǵa jınalyp otyrmyz.
- Qurmetti, ata - analar, ustazdar, qonaqtar árıne, bastaýysh synyptyń túlekteri búgingi saltanatty merekelerińiz qutty bolsyn!
- Olaı bolsa, qurmetti shákirtterim sóz kezegi ózderińde!
Váls áýenimen synyp oqýshylary ortaǵa kelip, bıleıdi.
Áýenniń sońynda sahnaǵa shyǵyp, tórden oryn alady.

Aımaǵanbet:
- Assalaýmaǵaleıkým, aǵaıyn!
Záırash:
Armysyzdar, muǵalimder áz jandar
Bilim izdep, ınemen qudyq qazǵandar!
Qushaq jaıa qarsy alamyz sizderdi
Bı bıleıik, án de búgin shyrqalar!
- «Sálem – sózdiń anasy» - demekshi, armysyzdar, aıaýly ustazdar men aq jaýlyqty analar, ardaqty ákeler!
Aqyltaı:
Armysyzdar!
Jaryq sáýle kóbeısin!
Armysyzdar! Armysyzdar!
Ásem áýen tógilsin! Orta tolsyn, jol ashaıyq!
Araılym:
- qadirmendi qonaqtar, biz búgin eń alǵash qalam ustap, álippemizdi usynǵan ustazymyzǵa rahmet aıtý saltanatyna jınalyp otyrmyz!
Jannur:
- Sonymen, « Bastaýyshym - baqytty shaǵym» atty erteńgiligimizdi bastaýǵa ruqsat etińizder!
Ǵazız: Búgin bizde úlken qýanysh, úlken toı!
Almas: Búgin qyzyq, búgin toı,
Bizder úshin bilip qoı.
Toıǵa shashý shashaıyq
Shyrqap ánge salaıyq.
(shashý shashylady)
Aımaǵanbet:
- «Bir kún tanystyqqa, qyryq kún sálem» demekshi, biz osy qaı mektepte oqımyz?
Záırash:
- «Mektep – ǵylym patshasy» emes pe? Biz Keńes Odaǵynyń batyry Nurken Ábdirov atyndaǵy № 10 orta mekteptiń 4 «á» synybynda oqımyz.
Aımaǵanbet:
- «Jas kelse – iske» demekshi, bul mektep ustazdarynyń deni jastar. «Ustazy jaqsynyń - ustamy jaqsy»- degen ǵoı.
Jannur
- «Oqý bilim – bulaǵy, bilim - ómir shyraǵy» - degen, bul mektep talaı jas búldirshinderdi bilim nárimen sýsyndatyp, azamat qataryna qosyp keledi.
Aqylbek:
- Mine, bizdiń de osy kıeli shańyraqtyń tabaldyryǵyn attaǵanymyzǵa da 4 jyl bolypty.
Án: «Mektebimiz – kememiz»
Záırash:
Kóterip júktiń salmaǵyn
Jolynda ómir talmadyń.
Meıirimiń qandaı shýaqty
Ustazym, asyl ardaǵym!
Ásem:
Esińde me ustazdyń alǵash qarsy alǵany,
Aıqara esik ashyp tastaǵany.
Bir mereke dýman bop osy mańda,
Jetelep bir synypqa ap barǵany.
Án: «Bastaýysh synyp válsi»
Almas:
Iá, ǵulama bilgish, ǵalymnan,
Oqýshy jas jalynnan
Asa iri oıshyldan,
Prezıdent, aqynnan,
Ǵaryshker uly batyrdan,
Óneri tasqan akterden,
Myń buralǵan bıshiden
Oı terbetken kúıshiden,
Oqyǵan jas - káriden,
Oqýshynyń bárinen
Hormen: «Ustazdarǵa myń alǵys!»
Araılym:
Jyldar, jyldar ótse de kóp,
Umytpaımyz máńgilik.
Qansha ómirde etseń eńbek,
Ustaz seniń úlesiń mol.
Aıaýlym:
Bar bilim bastaýyshtan bastalady.
Shyǵarmyz shyńǵa bıik asqaraly.
Tynymsyz izdenisti eńbegińiz
Jibek apaı, áli - aq aqtalady.
Umytpas túlekteriń, sizdi Jibek apaı,
Qolyna alǵash qalam ustatqandy.
Aldyńyzda árqashan taǵzym etip,
Turady «Ustazym» dep basyn ıip.
Ǵazız:
Erdiń quty sáni de
Eldiń kúı men áni de,
Kezek berem án - kúıge
Mýzykanyń pánine
Esińde me, án sabaǵy
Jibek apaı odan dáris bergeni
Basyńdy ıip alǵysyńdy aıtarsyń
Eńbegin de ustazdyń sen aqtarsyń!
«Grýzın» bıi
Qol soǵyp ortaǵa shaqyraıyq.
Ǵazız:
Bar kitapqa bas bolǵan,
Álippe – ǵylym danasy.
álippeni qurmettep,
joǵary orynǵa qoıamyz!
Aıaýlym:
- Sonymen 4 jyl boıy biz: ana tili, qazaq tili, orys tili, matematıka, dúnıetaný, mýzyka, tehnologıa, dene tárbıesi, beıneleý óneri pánderinen bilim nárimen sýsyndap keldik.
Jannur:
Áıgerim muǵalimge:
Aǵylshynsha oqydyq tilin bildik,
Dybystardy taldadyq, syryn bildik.
Sonyń bárin jalyqpaı, túsindirdiń
Sonyń bárin bizderge uǵyndyrdyń.
Ásem:
Aıgúl muǵalimge:
Bulbul únin qanshalyq,
Tyńdap júrdik tamsanyp.
Aqyrynda úırettiń
Tamyljyta án salyp.
Záırash:
Saılaýgúl muǵalimge:
Kóńilin bar shákirttiń taba alatyn,
Keýdelerge namys otyn jaǵa alatyn.
Ózińdeı bolsa, shirkin, barlyq ustaz
Qoly sheber, kúmis kómeı, sózi altyn.
Aqylbek:
Aınagúl muǵalimge:
Endi mine, saǵymdaı óte shyqty,
4 jyl ýaqyt az ba eken kim bilipti?
Ustaz - ana jasady myna bizden
El tanıtyn, azamat, bir - bir myqty.
Hormen: «Pán muǵalimderine myń alǵys!»
Halyq áni «Qara jorǵa»
Án: «Altyn uıa mektebim»
Oryndaıtyn: hor
Aqylbek:
Úlkendi syılaý – qazaq halqynyń ata salty. Úlkendi syılaý eń aldymen áke men shesheńdi syılaýdan bastalady.
Ásem:
Bala ata - ana isinen kópti úırenip qana qoımaı,
Olardyń tárbıesin de boıǵa sińire biledi. Sondyqtan 4 jyl boıy oqyǵanda ata - ananyń da eńbegi mol.
Hormen: «Ata – ana, sizge myń alǵys!»
Kelesi án ata - analardyń qurmetine arnalady.
Án: «Ákeshim - anashym»
Oryndaıtyn: Aımaǵanbet pen Aqylbek
Án: «Áje»
Oryndaıtyn: Araılym Aǵybaıqyzy
«Ózbek» bıi Bıshiler toby
Ortaǵa mektep tabaldyryǵyn attaǵaly otyrǵan mektepaldy daıarlyq tobynyń tárbıelenýshilerin shaqyramyz. Óleń joldaryn oqıdy. Bastaýysh synyp túlekteri estelikter tapsyryp, án joldaıdy.
Án: « Tusaý keser»
Án: «Bala tilegi»
Aımaǵanbet:
Esińde bolar, mektepke alǵash kelgeniń,
Úrke qarap, esigin bilim ashqanyń.
Sol bilimniń bulaǵyna shomyltqan
Ustazdardy umytpaǵyn, dostarym!
Aqylbek:
Janym tolqyp, lúpildeıdi júregim,
Boıym ósip, oıym tolyp, túledim.
Biri qurby, biri shyn dos biz úshin
Bolamyz endi joǵary synyp túlegi.
Araılym:
Alǵashqy ustazymyzdyń
Ardaqtaımyz atyn biz.
Uqsap súıikti apaıǵa
Ósip kele jatyrmyz.
Aımaǵanbet:
Bir uıadan túlep ushqan qustarmyz
Jaqsylyqpen adaldyqqa qushtarmyz.
Eńbek penen tirshilikke sán bersin,
Dostyq týyn ár kez bıik ustarmyz.
Án: «Batyr Baýyrjan»
Oryndaıtyn: hor
Oqýshylar aǵylshyn tilinde án salyp, óleń shýmaqtaryn aıtyp, shaǵyn kórinis qoıady.
Aımaǵanbet:
Qoshtasý keshi qobaljytady,
Kóp kútken edik emes pe?
Kózinde balalardyń jas móldireıdi
Umytylmaıdy bul este.
Ásem:
Ustaz!
Bizge etken eńbegińdi jetkizer,
Aýzymyzǵa sóz túspeıdi, ustazym!
Sóz de tipti, qajet emes atyńdy
Shyǵaramyz myna bizder
Eńbegińniń jemisin.
Aıaýlym:
Seniń isiń erlikteıin baǵaly,
İzi máńgi júrekterde qalady.
Juldyzdy isińdi
Bıik, qatal, jarqyn, taza ustazym,
Ǵalamdaǵy
Qasıettige baladym!
Záırash:
Sondyqtan da bul sátti qasıettep,
Máńgi saqtap qalarmyz júrekte biz.
Qosh aıtysyp sońǵy ret osy jerde
«Myń alǵys, bastaýyshym, saǵan!» deımiz
Senen alǵan bilimge de rahmet!
Senen tapqan dostarǵa da rahmet!
Bastaýyshym, qoshtasarda taǵy da
Júz qaıtara aıtarymyz rahmet!
Synyp muǵalimi oqýshylardyń 4 jyl boıy jetken jetistikterine toqtalyp, oqýshylardyń «Balaýsa» atty shyǵarmashylyq jumystarynyń jınaǵymen tanystyryp ótedi.
Qazirgi zaman bıi
Synyp muǵalimi ata - analar men pán muǵalimderine arnap saýaldar qoıady.
Án: «Alǵashqy ustazym!
Án: «Ustazym»
- Oıtolǵaý, shyǵarmashylyq jumystarymen synyp oqýshylar ortaǵa shaqyrylady.
- Ata – analardan tilek pen bata suralady.

Qaraǵandy oblysy, Qarqaraly aýdany,
Nurken aýyly. Bastaýysh synyp muǵalimi
Nurmaǵanbet Jibek Serikqyzy