InfoHub Logo

Batys Qazaqstan joǵary medısınalyq kolejinde osy oqý ornynyń 100 jyldyǵyna oraı «Qazaqstan Respýblıkasynda «Densaýlyq» memlekettik baǵdarlamasyn júzege asyrý aıasynda meıirbıkeliń bilim berýdi jańartý» taqyrybynda halyqaralyq ǵylymı-tájirıbelik konferensıa ótkizildi.

Qazaqstan men Reseıdiń medısınalyq oqý oryndarynyń ókilderi, densaýlyq saqtaý salasynyń qyzmetkerleri qatysqan jıynda oblystyq densaýlyq saqtaý basqarmasynyń basshysy Qamıdolla Irmenov Batys Qazaqstan joǵary medısınalyq kolejiniń bir ǵasyr ishinde kóptegen tabystarǵa qol jetkizgenin atap ótti. QR Densaýlyq saqtaý jáne áleýmettik damý mınıstrligi Ǵylym jáne adamı resýrstar departamenti medısınalyq bilim jáne ǵylym basqarmasynyń basshysy Úlmıra Nuralıeva jyly lebizin arnaýmen birge kún tártibindegi taqyrypqa baılanysty baıandama jasasa, QR Densaýlyq saqtaý jáne áleýmettik damý mınıstrligi meıirgerler isi boıynsha shtattan tys bas mamany, «Qazaqstan Respýblıkasy medısınalyq kolejderi odaǵy» zańdy tulǵalar birlestiginiń tóraǵasy, medısına ǵylymynyń doktory Sultan Seıdýmanov ta kolej ujymyn ǵasyrlyq toıymen quttyqtady. Sondaı-aq Reseı Federasıasy «Samara memlekettik medısınalyq ýnıversıteti» meıirgerlik bilim berý ınstıtýtynyń dırektory, medısına ǵylymynyń doktory, profesor    Larısa Karaseva, N.Lápına atyndaǵy Samara medısınalyq kolejiniń dırektory Nadejda  Iarochkına, Aqtóbe oblysynyń meıirbıke isin damytý ortalyǵy   dırektorynyń  orynbasary Zamzıa Alıpova jáne basqalar sóz alyp, tájirıbe, oı-pikirlerimen bólisti.

2016-2020 jyldarǵa arnalǵan «Densaýlyq» baǵdarlamasyna sáıkes jańa talaptar qoıylyp, Batys Qazaqstan medısınalyq kolejiniń Batys Qazaqstan joǵary medısınalyq kolejine aınalǵany atalyp ótildi.

Konferensıadan keıin oblystyq qazaq drama teatrynda ótken saltanatty jıynda Batys Qazaqstan joǵary medısına kolejiniń ujymyn mereıtoıymen óńir basshysynyń atynan oblys ákiminiń birinshi orynbasary Arman Óteǵulov quttyqtap, bir top qyzmetkerge oblys ákiminiń alǵyshatyn tabys etti. Jıyn barysynda sondaı-aq ozat qyzmetkerlerge QR Densaýlyq saqtaý jáne áleýmettik damý mınıstrliginiń «Densaýlyq saqtaý isiniń úzdigi» tósbelgisi men qurmet gramotalary, basqa da marapattar tapsyryldy.

Batys Qazaqstan joǵary medısınalyq kolejiniń dırektory Nurjan Shombalovtyń aıtýynsha, kolej elimizdegi eń alǵashqy medısınalyq oqý orny bolyp tabylady. Oral qalasynda feldsherler men feldsher-akýsherlerdi daıarlaıtyn feldsherlik-akýsherlik mektep 1916 jyly 1 qarashada ashyldy. Budan keıin 12-15 jyldan soń ǵana Qazaqstanda basqa medısınalyq oqý oryndary ashyla bastady. 1923 jyly atalǵan mektep Qazaq ólkelik medısınalyq tehnıkýmy retinde sol kezdegi el astanasy Orynborǵa aýystyryldy. 1929 jyly astana Qyzylordaǵa aýystyrylǵannan keıin tehnıkým Oralǵa qaıta oraldy.

Qazirgi tańda kolej - elimizdiń jetekshi medısınalyq kolejderiniń biri. Alty mamandyq jáne 8 biliktilik boıynsha medısınalyq qyzmetkerlerdiń joǵary bilikti jáne quzyretti kadrlaryn daıyndaıtyn Qazaqstan Respýblıkasy Densaýlyq saqtaý mınıstrliginiń bazalyq oqý orny bolyp tabylady. Búginde kolejde 1050 stýdent bilim alýda.

2014 jyly Batys Qazaqstan medısınalyq koleji Qazaqstan Respýblıkasynyń úzdik alty medısınalyq koleji qatarynda meıirbıke isi mamandyǵy boıynsha qoldanbaly bakalavrıattyń bilim berý baǵdarlamasyn engizýdiń DSM synamaly jobasyn iske asyrýǵa qosyldy. Bul joba «Qazaqstan Respýblıkasynyń densaýlyq saqtaý salasy sektoryndaǵy tehnologıalardy berý jáne ınstıtýsıonaldyq reforma júrgizý» Dúnıejúzilik bank jobasy aıasynda daıyndalyp, engizilýde.

Kolej pedagogtarynyń kópshiligi joǵary jáne birinshi sanatqa ıe. Almaty, Astana, Túrkıa, Reseı, Fınlándıa, Ispanıa, AQSH, Germanıada oqýdan, tájirıbeden ótken. Jyl saıyn oqytýshylardyń 96 paıyzyna jýyǵy óz biliktilikterin arttyrady. Kolej túlekteri elimiz óńirlerinde tabysty eńbek etýde, olardyń 92-93 paıyzy jyl saıyn mamandyǵy boıynsha qyzmetke ornalasady, qalǵandary JOO-larǵa túsedi.

 

 

---