InfoHub Logo

Bulqyshev Baýbek (1916, Qaraǵandy oblysy Ulytaý aýdany — 1944, Ýkraına, Dnepro-petrovsk oblysy Sofevsk aýdany) — jazýshy. Shyǵarmalaryn qazaq, orys tilderinde jazǵan. Qarsaqbaıdaǵy FZO mektebin bitirgen (1935). Almaty saýda-qarjy tehnıkýmynda oqı júrip (1937), kóptegen óleń, «Balalyq shaq» poemasyn, «Aýyldan Almatyǵa» atty áńgimesin jazdy. 1939 j. «Lenınshil jas» (qazirgi «Jas Alash») gazetinde ádebı qyzmetker, keıin «Qazaqstan pıoneri» (qazirgi «Ulan») gazetinde bólim meńgerýshisi bolǵan. 1940 j. Keńes Armıasy qataryna shaqyrylady da, Máskeý áskerı ýchılıshesinde oqıdy. Baýbek Uly Otan soǵysy maıdandaryndaǵy urystarǵa alǵashqy kúnderden bastap qatysady. Onyń soǵystaǵy otanshyldyq erligi ata dástúriniń jalǵasy ispetti. Baýbektiń ákesi A. Imanov basqarǵan ult-azattyq qozǵalysyna belsendi qatysqan. Ata dástúrine berik azamat, jalyndy kósemsóz sheberi, erjúrek jaýynger Máskeýdi qorǵaý, Ýkraınany azat etý shaıqastarynyń bel ortasynda boldy.

1944 jyldyń bas kezinde maıdanda qaharmandyqpen qaza tapty. Baýbek Bulqyshev kóptegen óleńder jazyp, respýblıkalyq baspasóz betterinde jarıalady, onyń «Almaty — meniń týǵan qalam» degen bitpeı qalǵan romany jáne «Aısulý» degen poemasy bar. Bulqyshevtyń shyǵarmashylyq daryny Uly Otan soǵysynyń aýyr syn saǵattarynda erekshe kórindi. 1942 j. 1 mamyrda «Komsomolskaıa pravda» gazetinde Bulqyshevtyń «Ómir men ólim týraly» (jas qazaq áskeriniń haty) degen órshil, otanshyl maqalasy jaryq kórdi. Soǵys kezinde jazǵan shyǵarmalarynyń deni «Komsomolskaıa pravda» gazetinde jarıalandy. Baýbek Bulqyshevtyń «Ia hochý jıt», «Jızn prınadlejıt nam», «Kovarstvo ı lúbov», «Pısmo syný Vostoka», «Slýshaı, Kavkaz» jáne basqa maqalalaryn kórnekti jazýshy Ǵ. Músirepov qazaq tiline aýdaryp, resp. «Sosıalısik Qazaqstan» (qazirgi «Egemen Qazaqstan») gazetinde jarıalady. B. shyǵarmalary ádebı jınaqtarda («Jızn soldata», M., 1946; «Jýrnalısy v shıneláh», A.-A., 1968; «Esimizde qandy maıdan joryqtary», A., 1968) basyldy, jeke kitap bolyp jaryq kórgen.

Oqýǵa keńes beremiz: 

Baýbek Bulqyshev shyǵarmalary

---