InfoHub Logo

Bir orta jastan asqan adam men, bir jas jigit jol júrip kele jatady. Ekeýiniń de tirshiligi qubatóbel, mingen kólikteri shardaq eken. Kún túske tyrmysqan shaqta bir belden asyp túsken jolaýshylar qaıran qalyp turyp qalady. Aldarynda mal tuıaǵy tımegen, shúıgin jaılaý, kók sazdyń qaq ortasynda toǵyz qanat oq orda tigýli tur. Minezi jeńiltekteý jas jigit «apyr-aı, bul kimniń aýyly eken, bul jerge eshkim qonbaýshy edi ǵoı» deı bergende kórgeni kóp qarasaqal: «Sabyr et balam, bul tegin úı emes, ne de bolsa, baryp kóreıik», — deıdi. Ekeýi de qazaqy eski ádetpen attan túsip, attaryn jetelep aýylǵa jaıaý keledi. Úıdiń tusyna kelgende eresegi: «Shóldedik, sýsyn keltirińiz», — deıdi. Sol sátte syqyrlaýyq aıqara ashylyp, ishinen bir jan ıesi shyǵady. Bir qolynda kón shelekke quıylǵan qoı sútiniń aırany, ekinshi qolynda súıretpe toly qysyraqtyń qymyzy eken. Asyǵys qımyldaıtyn jas jigit kón shelekti qaǵyp alady da, muzdaı aırandy basyna bir-aq kóteredi. Al eresek asyqpaı súıretpeniń aýzyn sheship, qoınynan tostaǵan alyp, soǵan quıyp bir tostaǵan qymyz ishedi. Sonda sýsyn alyp shyqqan úıdiń ıesi jas jigittiń betine qarap turyp: «Sabyrsyz neme! Qoıly bolady ekensiń», — deıdi de, úlken adamǵa burylyp, «Al sizdiń jylqyńyz kóp bolady eken», — deıdi. Bylaı shyqqannan keıin jigit jolseriginen: «Bu ne keremet, myna turǵan úı ne, úıdiń ıesi kim?» dep suraıdy. Serigi — «Úndeme, qudaı jarylqady, bizge Begimsaldyń ózi jolyqty», — deıdi. Kóp uzamaı osy eki adam jer qaıysqan mal ıesi bolyp shyǵady.

 

---